DILI, STLNEWS.co – Ministru Administrasaun Estatal (MAE), Miguel Perreira de Carvalho hateten, nia parte aprezenta ona kandidatu hamutuk nain hat (4) ba Prezidensia Konsellu Ministru (PCM – sigla Portugues) hodi halo deliberasaun liu husi reuniaun Konsellu Ministru.
“Prosesu hotu hau haruka mai iha Prezidensia Konsellu Ministru nia meja, agora hein deit Primeiru Ministru marka hodi ajenda deside kandidatu nain hat se mak sei sai Prezidente Autoridade Munispiu Dili,” dehan MAE Miguel Perreira de Carvalho wainhira remata enkontru ho Primeiru Ministru Taur Matan Ruak iha Palasiu Governu, Kinta (22/07/2021).
Governante nee afirma, hafoin aprezenta kandidatu nain hat (4) ba Prezidensia Konsellu Ministru, semana rua mai bele halo diskusaun ona hodi nomeia Prezidente Autoridade munispiu Dili.
Entretantu rezultadu teste eskrita ba kandidatu Prezidente Autoridade Munisipal Dili, konklui ona no Guilhermina Filomena Saldanha, hetan valor diak liu (13.6) tanba resposta los ba pergunta hamutuk 68.
Aleinde nee kandidatu sira seluk, kompostu husi Abilio Mesquita “Mausoko”, Antonio Moniz Calau hetan valor hanesan 13.2 no lvete de Fatima Sarmento de Oliveira, fo resposta los ba pergunta hamutuk 66. Nunee, kandidatu Sabino da Costa hetan valor 11.8 tanba fo resposta los ba pergunta hamutuk 59 no kandidatu Manuel da Silva hetan valor 10 tanba fo resposta los ba pergunta 50.*
Reportajen: Alberto Menezes
Editora: Domingas Gomes
