MAE Distribui Farda Ba Xefe Suku

Ministru Administrasaun Estatal, Miguel Pereira de Carvalho. (Foto: STL/Natalina Lopes)

DILI, STLNEWS.co – Ministeriu Administrasaun Estatal (MAE) iha fulan Setembru tinan nee, distribui farda ba xefe suku sira iha Munisipiu 12 inklui RAEOA.

Lia hirak nee hatoo husi Ministru Administrasaun Estatal, Miguel Pereira de Carvalho ba jornalista sira, hafoin remata enkontru ho Komisaun A, iha Parlamentu Nasional, Dili, Kinta (24/09/2020).

“Agora dadauk fahe hotu ona ba iha Munisipiu sira, maibe sei falta tan Munisipiu 1 ou 2 maka seidauk fahe, ami fahe farda sira nee iha fulan ida nee nia laran, neebe xefe suku sira komesa simu ona sira nia farda,” dehan Ministru Miguel.

Ministru hatutan sira neebe seidauk simu nee laos farda latoo, maibe farda kompletu hela, maibe planu ba distribuisaun nee maka hahu husi Munisipiu ida ba too iha munisipiu seluk, neebe infelizmente foin konklui iha munisipiu balun, hela munisipiu 1 ka 2 maka seidauk.

“Ekipa Ministeriu Administrasaun Estatal lao hela ba iha munisipiu sira nee para halo distribuisaun, maibe ida nee tenke halibur xefe suku sira hot-hotu mai too iha postu, neebe iha sentru de munisipiu para atu halo distribuisaun,” tenik nia.

Nia dehan farda nee nia prosesu produsaun konkursu publiku, atu sosa farda sira nee halo iha kontratu akordu asina iha tinan 2019. Farda sira nee foin too iha Junu tinan ida nee.*

Reportajen: Natalia Lopes
Editora: Carme Ximenes

LEAVE A REPLY

Please enter your comment!
Please enter your name here