MAE Pose Administrador Munisipiu Covalima

Governu liu husi Ministeriu Administrasaun Estatal (MAE) ohin direitamente pose ona Administrador Munisipiu Covalima Francisco de Andrade. (Foto: STL/Donaciano Magalhães)

DILI, STLNEWS.co – Governu liu husi Ministeriu Administrasaun Estatal (MAE) ohin direitamente pose ona Administrador Munisipiu Covalima Francisco de Andrade.

Tuir Ministru Administrasaun Estatal (MAE), Miguel Pereira de Carvalho hateten, lolos pose ba Administrador Munisipiu Covalima realiza iha Suai, maibe tanba serka sanitaria no konfinamentu obrigatoriu, tanba nee halao deit iha Dili.

“Ohin governu sentral liu husi Ministeriu Administrasaun Estatal (MAE) fo pose ba Administrador Munisipiu Covalima neebe foin dadauk nee kompleta rekrutamentu por meritu,” dehan Miguel Perreira de Carvalho ba jornalista sira iha edifisiu Ministeriu Administrasaun Estatal, Caikoli, Kuarta (17/03/2021).

Miguel dehan, governu tenki foti desizaun lalais hodi pose ba Administrador Munisipiu Covalima tanba ho situasaun ida agora presiza tebes fo asistensia ba komunidade sira iha munisipiu refere.

Iha fatin hanesan Administrador Munisipal Covalima, Francisco de Andrade katak, planu prioridade neebe nia iha durante mandatu tinan lima mak sei haree liu ba bee mos, estrada, no eletrisidade ba komunidade sira.*

Reportajen Alberto Menezes/Donaciano Magalhaes
Editora: Domingas Gomes

LEAVE A REPLY

Please enter your comment!
Please enter your name here