MAE Sei Aprezenta Revizaun Ba Lei Eleisaun Prezidensial Ba Governu

Ministru Administrasaun Estatal (MAE) Miguel Pereira de Carvalho informa, tempu badak sei aprezenta revizaun lei tolu hanesan, lei ba eleisaun prezidensial, resensiamentu nomos lei eleitoral ba governu hodi halo apresiasaun. (Foto: Pajina Facebook Primeiro Ministro: S.E. Taur Matan Ruak)

DILI, STLNEWS.co – Ministru Administrasaun Estatal (MAE) Miguel Pereira de Carvalho informa, tempu badak sei aprezenta revizaun lei tolu hanesan, lei ba eleisaun prezidensial, resensiamentu nomos lei eleitoral ba governu hodi halo apresiasaun.

Kestaun nee Ministru Administrasaun Estatal (MAE) Miguel Pereira de Carvalho hateten, wainhira hasoru Primeiru Ministru PM Taur Matan Ruak iha Palasiu Governu, Tersa (02/02/2021).

“Ohin enkontru ho Primeiru Ministru (PM) Taur Matan Ruak atu informa serbisu minesteriu nia liu liu kona preparativus ba revizaun lei sira hanesan lei ba Eleisaun Prezidensial 2022 nomos lei resensiamentu eleitoral no lei eleitoral neebe dadaun nee prontu ona atu submete ba Konsellu Ministru hodi halo diskusaun no aprovasaun,” dehan Miguel.

Nia dehan, hafoin governu halo aprovasaun sei haruka ba Parlamentu Nasional hodi halo diskusaun liu liu lei Prezidensial tanba iha tinan oin 2022 fulan Marsu sei realiza eleisaun Prezidensial.

Enkuantu wainhira jornalsita husu kona ba iha revizaun lei ba eleisaun Prezidensial nee, karik limite idade ba kandidatu sira liu idade 70 anus ba leten labele kompete iha eleisaun Prezidensial Ministru nee dehan, iha konstituisaun RDTL so estabelese deit idade minimu ba kandidatura hanesan 35 maibe ba leten lei la bandu ida.

“Hau hanoin nee lalos tanba tuir ita nia konstituisaun hatete, kandidatu ba Prezidente estabelese deit idade minimu 35 anus de idade mais liu ida nee lei la bandu,” nia dehan.

Nia hatutan, eleisaun Prezidensial sei realiza iha fulan Marsu tinan oin (2022), tanba nee Sekretariu Tekniku Administrasaun Estatal (STAE) halo preparativus sira hanesan aumenta sentru votasaun wainhira mosu propagasaun Covid-19.

Hanesan agora dadaun STAE hanoin ona atu propoin sentru votasaun ka estasaun de votu hamutuk 1080 karik iha krize sanitaria.*

Reportajen: Alberto Menezes
Editor: Domingas Gomes & Crisogono Magalhães

LEAVE A REPLY

Please enter your comment!
Please enter your name here