DILI, STLNEWS.co – Oras nee daudaun makina bomba bee avaria iha Merkadu Taibesi la funsiona, tanba nee husu ba governu tenki toma atensaun ba problema nee.
Kestaun nee hatoo husi Koordenador Jestaun Merkadu Taibesi, Antonio Manuel de Araújo ba STL iha Merkadu Taibesi, Sabadu nee (22/04/2023).
“Fulan ida ona makina bomba bee avaria, automatikamente fasilidade hanesan haris fatin la funsiona, tanba nee ita nia vendedor sira tenki dezaraska sosa bee hodi utiliza ba nesesidade loron-loron nian,” hatete nia.
Tanba merkadu la asesu ba sistema kanalizasaun bee husi fatin seluk, durante nee utiliza sistema bee rai okos, neebe uza makina bomba hodi fornese bee ba vendedor sira iha merkadu, tanba makina avaria, laiha asesu ba bee.
“Hau hatoo ona ba Autoridade Munisípiu Díli liu husi departamentu ba too iha neeba, maibe seidauk iha resposta ida mai,” nia dehan.
Nia informa, vendedor sira sosa bee tanki neebe faan, entaun liga ho haris fatin sira paradu hela.
Iha fatin hanesan, Vendedor Abel dos Santos dehan, kondisaun Merkadu Taibesi la seguru ba negosiante sira atu halo negosiu.
“Iha nee tempu ami presiza ba haris fatin mos sintina la diak no fatin sira la diak hotu,” nia hatutan.
Nia husu ba governu ida nee tau atensaun atu sira bele halo negosiu ho diak, sira la husu buat barak ba governu, maibe sira husu deit fatin ida neebe dignu no seguru ba sira atu halao sira nia atividade negosiu hodi sustenta moris loron-loron nia.
(jen)
