DILI, STLNEWS.co – Ministeriu Agrikultura Pekuaria Peska no Floresta (MAPPF) liu husi Diresaun Nasional Irigasaun seidauk normaliza irigasaun iha Postu Laklo, Munisipiu Manatutu, neebe hetan estragus iha 4 Abril 2021.
Diretor Nasional Irigasaun, Martinho Laurentino Soares hateten, irigasaun iha Laklo nee, iha 2002 Japaun mak apoia no halo akompanhamentu, no MAP kada tinan, fasilita sira buat barak tantu trator, inklui fasilidade sira seluk, maibe infelizmente iha 2021 akontese udan boot no mota estraga kanal bokadura too Laklubar mota sumase neebe kuaze estraga hotu kedas.
“Governu tenta ona atu rezolve liu husi proposta, karik presiza halo estudu foun, tanba fatin neeba atu hadia deit gasta tempu, tanba hetan estragus todan, ami kolia ona, tinan nee la konsege hadia mak 2024 ita sei hatama lista ba estudu viabilidade foun,” dehan nia ba jornalista sira iha nia knaar fatin MAPPF Komoro, Kinta nee (03/08/2023).
Nia hatutan, ba oin karik atu hadia liu husi rekonstrui fali bokadura livre neebe uluk Japaun halo nee, maibe atu haree presiza koloka barajen iha neeba atu bele atende natar nain sira iha Laklo tuir sira nia nesesidade.
“Ita seidauk bele halo buat ida, karik ita atende ho makina sira nee mos la bele rezolve kestaun ida nee, tanba hetan estragus total, tan nee ita hanoin ona ba oin, halo fali estudu foun, atu nee husi vokadura too mota Sumase nee kuaze kilometru ida resin,” dehan nia.
Atu normaliza mota sira nee, governu liu husi IGE halao sira nia servisu hodi kontrola mota, maibe dala barak sei estragus mos iha relasaun ho agrikultor nian ba natar no toos, tan nee ladun hetan atensaun.
MAPPF iha ekipamentu pejadu, makina ida rua, maibe labele halo servisu, lori ekipamentu nee iha eskala boot, tanba servisu nee halo akizasaun ba makina sira nee atu hatama bee deit, laos atu suru mota.
(mad)
