DILI, STLNEWS.co – Ukun fuan Maromak nia hanorin ema atu pasensia hasoru saida deit no muda hahalok aat sira, nunee bele hetan salvasaun husi Jesus.
Lia hirak nee hatoo husi Padre Richardo Pasang, SVD ba STL Sabadu (16/09/2023) hatete, Maromak nia pasensia neebe Paulo koalia, eziji ema nia resposta ativu. Paulo hakarak esplika atu ema keta hanoin sala katak Maromak husik ema halo saida deit tuir nia hakarak.
“Maromak pasiensia atu ita iha oportunidade atu bele mudansa husik hahalok aat sira no habarak hahalok diak sira iha ita moris. Ita sei sala boot wainhira ita la prekupa ho Maromak ninia pasiensia no demora atu mudansa,” katak nia.
Padre hatutan, Maromak hakarak mudansa konkretu ida husi ema mak hahalok pasiensia. Maromak hakarak ema hamoris hahalok pasiensia ba nia maluk sira tanba Maromak pasiensia ona ho ema. Pasiensia iha kait malu ho koalia neneik/mamar no la hirus.
“Ema pasiensia mak ema neebe kuidadu tebes ba liafuan sira neebe sai husi nia ibun. Jesus liu Evangelho ohin loron koalia kona ba saida deit neebe sai husi ita ibun katak hanesan espresaun husi fuan.
Liafuan sira sai hanesan imagem buat neebe rai iha fuan. Tan nee ita presiza kuidadu lisan atu bele sai ema ida neebe pasiensia. Ema dehan Maromak hadomi tebes ema neebe pasiensia (orang sabar dikasihi Tuhan),” katak nia.
Ema barak bele hare frutus husi pasiensia iha moris lor-loron. Ema neebe pasiensia, la dun hetan asidente wainhira nia lori motor ou kareta. Hirus malu, laran moras malu, baku malu sei la akontese sekuandu pasiensia hodi rona no kompreende malu iha nia moris hamutuk. Ema moras bele diak fali se hetan domin husi ema ida neebe pasiensia hodi hein no kuidadu. Oan sira bele moris diak no maduru tanba iha ema ida neebe pasiensia hodi hanorin buat diak ba sira. Estudante sei susesu se nia mestre sira pasiensia hodi hanorin.
“Mai ita hotu apriende hodi pasiensia iha ita nia moris. Pasensia sei manan buat barak iha ita nia moris. Maromak sei hadomi duni ema pasensia sira (Orang sabar dikasihi Tuhan). Saun Corneliu no Cipriano pasiensia tebes wainhira hasoru perseguisaun husi Valeriano duni sai sira too mate nuudar martires,” katak nia.
“OrasaunNai, Ita be haraik ba Ita povo, husi Saun Cornelio no Cipriano, bibiatan diak no martir barani. Haraik tulun mai ami husi sira, atu ho fiar metin ami bele halo servisu ho badinas ba Kreda nia unidade. Amin,” katak Pe. liu husi orasaun.
Nunee mos tuir Evanjelho loron Sabado semana XXIII do tempu komum Memoria Saun Cornelio, papa e Saun Cipriano, bispu, martires. 1 TIM 1 : 15 – 17 LUC 6 : 43 – 49 Nai Jesus Kristu nia Evangelhu tuir Saun Lucas.
Iha tempu neeba, Jesus dehan ba eskolante sira La iha aihun diak neebe fo fali fuan aat, eh aihun aat neebe fo fuan diak. Ema neebe bele hatene aihun ida-idak husi nia fuan, ema la kuu ai figueira nia fuan husi aitarak sira, eh uvas fuan husi ai fuik. Ema diak hasai buat diak husi laran diak, ema aat hasai buat aat husi nia laran aat. Ema nia ibun koalia husi buat neebe hakonu nia fuan. Tan sa imi bolu hau ‘Nai, Nai”, maibe la halo tuir buat neebe hau hateten? Ema neebe mai besik hau no rona hodi halo tuir hau nia liafuan, Hau sei hatudu bai mi ema neebe hanesan sa los? Nia hanesan ema neebe harii um ai ida, nia kee klean hodi tau nia hun iha fatuk leten, wainhira mota sai boot, be baku hasoru uma nee maibe la bele sobu basa harii tiha iha fatuk leten. Maibe ida neebe rona hodi la halo tuir, nia hanesan ema neebe harii tiha uma ida iha rai leten, hun la iha. Wainhira mota sai boot no be baku hasoru nia, uma nee monu kedas, sobu rahun aat liu.
(eme)
