Mate Isin Thomas Pereira Too Iha TL

Mate isin traballador Timoroan Thomas Pereira neebe hetan asidente iha Tasmania (Australia) too ona Timor Leste ho aviaun Airnorth kode TL 08. (Foto: STL/Donaciano Magalhães)

DILI, STLNEWS.co – Mate isin traballador Timoroan Thomas Pereira neebe hetan asidente iha Tasmania (Australia) too ona Timor Leste ho aviaun Airnorth kode TL 08. Dehan SEFOPE, Alarico de Rosario ba jornalista sira, iha Aeroportu Nicolau Lobato, Comoro, Dili, Tersa (16/02/2021).

“Ita hotu hatene katak, ita nia alin Thomas Pereira nia hetan asidente iha loron 9 fulan Janeiru tinan 2021 iha Tasmania. Ohin loron ninia mate isin too ona iha Timor Leste ho Aviaun Airnorth,” dehan SEFOPE Alarico.

Nia dehan prosesu mate isin too mai ohin loron nee prosesu ida naruk tebes ho razaun katak, situasaun Covid-19 ida nee maka ninia prosesu nee lao naruk lahalimar, tanba regras neebe maka iha Australia neeba nee difisil lahalimar.

Governante nee hatutan konaba transporte, durante nee Timor Leste laiha transporte, neebe tenke laran metin ba nasaun vizinu Australia ho Indonezia, ida nee maka bele fasilita Timoroan sira hodi lori tama no sai.

“Durante nee ema lockdown, neebe ita labele halo buat ida tanba nee sei liu husi prosesu, maibe ohin ita agradese, tanba ohin mate isin bele too mai iha Timor Leste,” tenik governante nee.

SEFOPE, Alarico do Rozario. (Foto: STL/Donaciano Magalhães)

Alarico esplika kronolojia husi mate nee tanba hetan asidente husi kareta, kareta nee mos nia nain rasik maka lori kareta depois nia ladun kontrola kareta halai makaas no halai sai husi estrada maka matebian nee monu sai husi kareta.

Durante nee traballador sira ba servisu iha rai liur nee sira hetan asuransi, neebe bainhira hetan buat ruma ajensia ho kompania maka trata orsamentu hodi mate isin nee mai Timor.

“Ita koalia konaba orsamentu asuransi nee diretamente husi ajensia ho kompania. Konaba orsamentu matebian nia inan ho kompania maka hatene, SEFOPE nia servisu nee fasilita deit dokumentus sira hodi haruka ba no haruka mai, atu trata deit oinsa para mate isin nee mai, maibe koalia konaba osan nee ami labele hatete kona ba ida nee,” nia esplika.

Nunee mos Inan husi matebian, Thomas Pereira, Anita Soares, dehan, nuudar inan no aman sente triste tebes, tanba nia sai husi Timor ba servisu nee ho diak, maibe agora fila mai ho tristeza boot, maibe buat hotu ho planu Nain Maromak nian, neebe realidade neebe maka iha famila tenke simu.

Nia hatutan mate isin agora toba iha uma Tasi Tolu, aban dadersan sei lori liu ba moris fatin Viqueque, no halot iha neeba tuir kultura nian.

“Hau agradese tebes ba estadu Timor no estadu Australia, neebe servisu hamutuk maka ohin lori fila fila hau nia oan mai fali Timor,” katak nia.

Reportajen: Natalina Lopes
Editora: Carme Ximenes

LEAVE A REPLY

Please enter your comment!
Please enter your name here