DILI, STLNEWS.co – Tristeza hafalun uma Kreda, liu-liu kongregasaun kanosiana lakon relijioza diak ida, Madre Maria Lurdes de Jesus, FdCC hakotu iis iha Hospital Nasional Guido Valadares (HNGV), iha oras 07:22 dader OTL, tanba moras komplikadu.
Madre Maria Lurdes de Jesus, FdCC moris iha Watukarbau, iha loron 16 Janeiru 1965, aifuan domin husi aman Valentin de Jesus (Matebian) no inan Domingas Fatima (Matebian), maun alin hamutuk nain 10 kompostu husi feto 5 no mane 5, maibe feto nain 3 no mane 1 mate, entaun hela sira nain 6 deit, Madre Maria Lurdes de Jesus, FdCC oan ba dala 5.
Mate isin husi HNGV lori mai iha uma fukun Kanosiana Bekora, iha oras 10:30, simu husi madre sira, akompanha orasaun no kanta, lori mate isin tau iha Kapela Kanosa Bekora, nunee iha minutu balun deit kontinua kedas ho misa, prezidi husi Padre Nivio Correia Lebre, FdCC. Depois de misa familia no Madre Kanosiana sira kontinua velada ba Matoban Me. Maria Lurde de Jesus, FdCC.
“Ba ami senti tristi, tanba lakon alin diak Me.Maria Lurdes de Jesus, FdCC, maibe nee planu Maromak nian, tanba mate dalan ita hotu nian sei tuir,” dehan Bin Noemia de Jesus ba STL iha Kapela Kanosiana Bekora, Kuarta nee (04/10/2023).
Nia dehan, Me. Maria Lurdes de Jesus, FdCC antes nee moras ona, depois rekupera moras fali, iha loron 29 Setembru 2023 Madre baixa iha HNGV i iha loron 04 Outubru 2023, iha oras 07.22 dader hakotu iis iha HNGV.
Familia senti lakon relijioza diak Me. Maria neebe durante husik familia, entrega ba uma kreda iha kongregasaun kanosiana hodi servi sarani sira liu husi nia misaun neebe saran aan ba Maromak.
Tuir orariu neebe iha, maktoban Me. Maria Lurdes de Jesus, FdCC kalan ida hamutuk komunidade kanosiana no familia sira, i aban misa funebre iha Igreja Sagrado Coracao de Jesus Bekora, tuku 05.00 lokraik, misa nee prezidi husi Bispu Baukau, Dom Leandro Maria Alves, depois de misa sei halot maktoban Me. Maria Lurdes de Jesus, FdCC iha Semiteriu Bekusi.
(joa)
