Média Sai Impacto Bo’ot Ba Identidade Naçional Timor-Lesta Iha Contemporâneo

Husi: Selfiyano. B. Correia
No. WA/telephone: +6282236265396
(Seminarista SVD, Estudante do Instituto Superior de Filosofia Católica Ledalero, Maumere, Flores-NTT)

Introdusaun
Liu husi publikasaun no iha varanda intelectualidade ida ne’e ho objetivo atu relata uitoan konaba média husi rai liur, liu-liu iha Indonezia ne’ebe maka fo interpretasaun barak kona ba kondisaun iha Timor-Leste. Ida ne’e importante tebes mai ita, nudar cidadão sempre iha interese comum hodi konxiente no tau matan ba papel iha média sira ne’ebe mak dalaruma mos halo divulgasaun barak konaba condiҫão no situasaun iha ita nia país. Los duni katak, ida ne’e afeita tebes ba ita nia identidade nudar nasaun ida. Nudar Timor oan ita mos presiza fo kontribuisaun no halo kontrolu mos ba situasaun atual ne’ebe mak akontese dadaun iha média social ne’ebe maka relasiona ho ita nia nasaun. Ida ne’e nudar esperiensia no sai materia ida mai ita hodi bele eduka ita sai ema ne’ebe maka hatene crítica no responde ba problema ne’ebe maka afeita husi média. Tamba ita hatene katak média nudar instrumento relativo no autonomia ne’ebe maka ema hotu-hotu iha poder hodi uza no fahe informasaun tuir sira nia hakarak. Tamba ne’e liu husi escrita badak ida ne’e, ha’u ata laiha sentido ou objetivo atu hamosu conflitos ruma ou ideia nebe maka atu provoca entre ita ho nasaun seluk. Maibe oinsa ita kuriozu nafatin hodi fahe informasaun ida ne’e nudar ferramenta política ne’ebe mak hafanun fila-fali ita foin sae nia sabedoria hodi responde ba problemas atual ne’ebe maka akontese.

Protégé no Mantein Nafatin Identidade Nasional Timor-Leste
Identidade nasional nudar expressão husi valor histórico nasaun ida ne’ebe mak exclusivo no diferente husi nasaun sira seluk. Pecularidade inerente nasaun hotu-hotu ne’ebe asosiado babain hanaran ho termo “identidade nasional”. No entanto prosesu formasaun ba identidade nasional ida la signifika katak remata ona, maibe nudar buat ne’ebe iha sempre mai ho mudansa no contextualmente akompanha mos ba desenvolvimento iha tempo naruk nia laran. Ida mos mak ita hanaran nudar identidade nacional país de Timor-Leste. Atu haktuir deit katak ita nia esforso laos luta hodi manan independensia deit, maibe ho independensia ita komesa tama ba etapa ne’ebe mak mai ho ezame oi-oin nudar nasaun foun ida ne’ebe maka foin hamrik mesak. Tamba ne’e ita presija estuda barak no esforsu hodi construir no mantein nafatin ita nasaun nia naran iha mundo. Ho analojía badak ita bele fo descrição katak lalaok husi identidade nasional Timo-Leste nudar jardim ida ne’ebe maka sempre exige cada ema ida-idak hamosu idealismu saudavel hodi fo crítico no autocrítico ba nia identidade nacional, hodi haburas liu tan no atualiza comprensaun konaba identidade nacional hodi bele sai significado liu tan.

Iha contexto identidade ida ne’e sempre relasiona mos perguntas ne’ebe maka mosu kona ba; ha’u mai husi ne’ebe? no ha’u nia obrigatorio nudar cidadão, saida maka ha’u bele halo buat ruma ba nasaun? Perguntas modelu hanesan ne’e nudar tipu existensial ida. Ita labele ignora pergunta ida ne’e tamba sei relaciona ho status ou posicao, pessoalmente hanesan mos cidadaos ne’ebe mak hela iha sociedade nia laran. Se karik ita rasik labele responde ba perguntas hirak ne’e, maka laos ema seluk deit maka questiona konaba ita nia identidade, maibe ita rasik confusão hodi questiona rasik konaba ita nia identidade.

Hodi evita perguntas erroneus hirak ne’e, ita presija halo motivasaun hodi hadomi no tane aas ita nia identidade no hodi promove diak liu tan iha nasaun laran no mos ba mundo. Laos atu hadomi deit, maibe ita rasik mos presiza reconhese no kuidadu trajetoria histórica nasaun nian. Tamba ita labele hadomi buat ruma ne’ebe maka ita rasik labele kuinese nia ho diak. Portanto iha parte ida ne’e cada pessoa iha dever hodi sai ema ne’ebe maka iha hanoin ne’ebe mak positivu no visionerio no hodi bele sai nudar volante ida ne’ebe mak bele lori ita ba to iha conheҫimento ida ne’e be mak klean konaba história pais nian.

Iha problema ida ne’e, signifika katak ita iha direitu no dever hodi proteze, hadomi, no buka tuir lia-los husi ita nia identidade nasional kona ba política, religião, cultura no estratificação social ne’ebe mak kuda ona husi ita nia lideransa sira no nudar foin-sae ita prezisa transmite nafatin husi jerasaun ba jerasaun iha ita nia nasaun. Tuir matenek nain Libanes Amin Maalouf husi nacão francesa afirma katak “a caracterização horizontal é o aspeto que determina quem somos ou quem somos nos? Signifika katak caracterização horizontal maka identidade ne’ebe sai hanesan kanal ida mai ita nia jerasaun atraves husi política, etnia, cultura, religião, estratos sociais, etc. Finalmente sei akompanha ita ba diversidade afiliasaun ou alianças. Diversidade afiliasaun ne’ebe maka babain hanaran expreção híbrido identidade propria, ne’ebe mak dalaruma hanesan mos nudar identidades puras. Ho conhecimento hanesan ne’e sei sai nudar alicerce básico ba ita nia nasaun atu ita bele firme nafatin hodi protégé ideología ne’ebe maka destrutivas. Liu-liu ba ideologia proseletísmo no apologética ne’ebe maka koko atu hafoer ita nia nasaun.

Média Barak Informa Noticia Fictício Kona ba Kondisaun Timor-Leste
“Mundu ida ne’ebe la iha faktu signifika mundu ida ne’ebe la iha lia-loos”, tenik husi Premiadu Nobel ba Paz 2021, Maria Ressa. Lia-fuan ida ne’e sai hanesan lia-fuan diak ida mai ita hodi descreve ambiente husi média ne’ebe mak ho plano oi-oin bobar lia kona ba Timor-Leste. Kondisaun atual, principalmente iha Youtube halo ema husi rai liur sira questiona kona ba condicão Timor-Leste depois de fahe malu ho Nasaun Indonezia. Noticias hirak ne’e sira produz no planejadas atu nune’e bele sai interesante hodi sira bele utilija nudar material ba consumidor sira iha público. Trasa dadaun ona mos conhecimento ne’ebe fictícias maka halo ema barak mak fiar ba informasaun ne’ebe mak sira pasa, até mesmo ema barak mos maka sai vítima hodi consumo informasaun falsa hirak ne’e. Ikus mai hípnotico ema barak husi rai liur ne’ebe mak fo sira nia hanoin ne’ebe diferente tebes kona ba situasaun Timor-leste. Atualmente viral dadaun iha redes sociais, no pública ona informasaun kona ba situasaun iha Timor-leste ne’ebe maka divulga ona ho lingua indonezia liu husi youtube ho título ne’be maka bombástico no hiperbóla mak hanesan; (Timor-leste nudar nasaun ne’ebe maka kiak liu iha mundo, Timor-Leste arepende wainhira fahe malu ho Indonezia, Mina rai Timor-Leste komesa maran, etc). Ate sira mos halo comparasaun ba capital Dili ho capital sira seluk ne’ebe maka iha rai liur, liu-liu iha Indonezia. Parte seluk, iha mos blafemias iha coluna comentario ne’ebe mak provocado. Irónia liu tan wainhira ita hare sira uza dados uluk nian hodi haforsa sira nia argumento iha média social.

Husi ne’eba, ita mos la hatene objetivo saida husi informasaun hirak ne’ebe mak sira fahe, será que iha relasaun ho problema pasado nian ou sira nia objetivo hodi hetan beneficio financeiro liu husi informasaun ne’ebe maka sira pública iha média. Ita hare katak informasaun oi-oin ne’ebe mak sira pública ona sai afeitadu tebes mai ita, nia realidade hatudu katak ema barak husi rai seluk maka fiar ona ba informasaun falsa hirak ne’e. Mesmo ita hatene momos katak buat ne’ebe mak sira halo nudar mal-educado no i-moral tebes, tamba gosta julga nasaun seluk ho dados ne’ebe maka incertos. Ema hirak ne’e ita bele hatete katak iha comprensaun no conhecimento ne’ebe maka limitada ko naba radicalismo, fanatismo, no justificativa ne’ebe maka erro no laiha base ne’ebe mak fudamentais. Sira komesa manobra atu hatudu iha média katak sira nia ideia no viasaun hirak ne’e laos mai husi imazinasaun ruma ou razaun ne’ebe mak ficticio, maibe nudar husi dados real ne’ebe maka sira hetan.

Relaçiona ho ida ne’e, ita hare katak ema husi nasaun seluk matenek liu, hodi intepreta kona ba situasaun ne’ebe maka akontese iha Timor. Tamba ne’e hau nia sugestão ida oinsa ita bele hamosu sentimento ne’ebe maka foun nudar cidadão Timor nian, atu ita bele eufaría liu tan hodi estuda no bele hatene klean liu tan ita ni ístoria rasik. Tamba ita nia nasaun presiza tebes ita nia prezensa, hodi bele hamoris liu tan unidade no fraternidade nudar cidadão ida, hodi bele responde ba problemá ne’ebe maka agora dadaun acontese iha ita nia rai laran. Ita nia visão no misão nudar foin sae maka oinsa hari fila-fali ambiente ne’ebe maka construtivo, hodi hetan fila-fali moris ne’ebe mak iha mudansa ba ita nia rain iha tempu ohin loron no ba futuro oin mai. Buat hirak ne’e ita halo nudar oferta ida ba ita nia heroi hirak ne’ebe maka halo ona sacrifíçio barak hodi lori ita nia rain ba manan independência.

Ita Nia Responsabilidade Hodi Hatan ba Problema Ne’ebe mak Acontese iha Média
Prinsipio husi responsabilidade nudar klalaok ou asaun hodi responde ba situasaun ne’ebe mak iha média. Oinsa ita bele responde no halo clarificação ba problema ne’ebe iha ita nia rain, tamba hamosu konfuzaun ou erro bo’ot husi nasaun seluk iha média online. La significa katak ita tem que responde ho agresivo maibe ita koko hamoris fila-fali ita nia emosaun intelectualidade. Oinsa ita expressa ho idealismo ne’ebe maka rasional ho norma ética nudar humano ida, atu la bele acontese tan mal-entendido entre ita ho ema seluk. Porque a pasiencia é uma única solucao para os males que não tem a solução. Ita koko prova buat hirak ne’e ho ita nia intelectualidade no conhecimento ne’ebe maka ita iha. Tamba hasoru malu ho idealismo ne’ebe maka diferente util tebes hodi bele completa malu liu tan.

Nudar nasaun ida claro que ita laos hare deit ba liberdade nudar projeto ne’ebe maka hotu ona, ne’ebe maka hein deit ita atu goja no halo comemorasaun, maibe ita mos prezija hamoris fila-fali ita nia creatividade ruma hodi hafurak liu tan identidade nasaun nian. Ita presija halo promesa mos ba ita nia-an ho comitmento hodi halo testemunha. Tamba lia-los husi testemunha maka valor ne’ebe maka importante ba ita identidade nudar Timor oan. Atu ita nudar foin sae bele luta hodi hakoak no defende ita nia nasaun husi ema aat sira nia hanoin.

Dala ida tan, ho sinceriedade no humildade husu ba ita foin sae sira hotu, atu la bele hare deit problema iha parte interior (problema ne’ebe mak iha nasaun laran), maibe ita presija sai husi zona ida ne’e hodi responde mos ba problema ne’ebe mak agora dau-daun acontese. Liu-liu média husi rai liur ne’ebe maka interpreta buat barak kona ba ita nia nasaun. Tamba ho mundo digital ohin loron, fasil atu ema uza oportunidade hodi ataka ita ho maneira ne’ebe maka oi-oin. Tamba husi ataka iha média nudar mos asaun assasinato ne’ebe mak abstrato no fo impacto mos ba psicología ema nian. Impacto husi psicología ida ne’e laos ba deit cidadão ne’ebe maka iha rai laran, maibe ba mos cidadao Timor oan ne’ebe maka escola ou serviҫo iha rai liur.

Tamba ne’e, nudar cidadão ne’ebe mak hadomi nia nasaun, ita prezija estuda barak husi esperiençia hirak ne’e, hodi bele sai guarda atu bele hari ai’i ri’in Timor nian metin liu tan. Testemunha hirak ne’e importante atu ita bele hetan fila-fali valor ne’ebe mak lakon ona, liu-liu hanoin ne’ebe mak negativu husi ema rai seluk kona ba ita nia nasaun. Atu nune’e ita bele moris hakmatek, no optimisme nafatin ho ita nia rain, no la prezija halo tan comparasaun ita nia nasaun ho nasaun seluk. Dala ida tan lalikan atu tauk no moe hodi contra ba informasaun falsa ne’ebe maka iha média, tamba husi uluk kedas ita nia nasaun esforso ho condisaun ne’ebe mak simples. Ita nia heroi sira só uja deit rama, diman, katana no ai-han mak hanesan batar no fehuk, maibe sei bele luta hodi hasoru invasor sira. Quanto mais ita ohin loron hetan ona formasaun no educação barak. Ita mos ativa ona iha sector no meios comunicacao oi-oin. Tamba ne’e ita iha dever hodi contra idealismo sira ne’ebe mak contrario husi nasaun sira seluk.

Maktakan
“Moris ne’e laiha mudansa se karik ita rasik la halo mudansa”. Nudar cidadão ida la bele hatoba ita nia intelectualidade hanesan cadavel vivo, hodi husik ita nia poder ba ema seluk mak fo interpretasaun em nome ba sira nia nasaun rasik. Maibe ita tem que barani hodi fo prioridade no comitmento ba ita nia-an rasik hodi salva ita nia identidade nasional Timor nian. Hau privado apresia tebes ho creatividade no talento barak husi foin sa’e ohin loron, ne’ebe mak produz ona buat barak liu husi talento ne’ebe maka sira iha. Buat hirak ne’e sai nudar riku-soin liu husi joventude sira iha tempo contemporanea. Maibe dificuldade ohin loron maka kona ba oinsa ita bele resolve prestígio nasaun nian ne’ebe mak ema husi rai seluk utiliza iha média no konsege kria informasaun falsa hodi hamonu identidade nasaun. Problema hirak ne’e mos ha’u sente importante atu ita bele tau matan hodi resolve hamutuk, atu la bele influenzia mos ba ita nia prezensa iha nasaun seluk. Liu-liu ba nai ulun ne’ebe maka iha Timor Leste laran tomak oinsa sira bele tau matan liu tan konaba situasaun Timor Leste nian ne’ebe mak grave tebes iha média sosial. Tamba nudar nai ulun ne’ebe mak sai hanesan agente sumidade, laos deit sai volante hodi resolve problema nasaun nian iha parte interior maibe mos iha parte exterior. Tamba atu hetan mudansa evolusioner ida ne’e, ita presija serbisu hamutuk entre povu ho nai ulun hodi hari sistema ne’ebe maka diak liu tan hodi alcansa ba plano furak kona ba ita nia rain doben. Liu husi média ne’ebe mak viral ona, ita koko atu estuda barak liu tan no hamosu espírito foun ida hodi bele lori Timor Leste ba iha mudansa ida ne’ebe mak diak liu tan no hatudo ba mundo katak Timor Leste mos bele…Timor Leste nia ona mos matenek…. Viva Timor-Leste.

Referências:
Budi Kleden, Paul. Bukan Doping Politik. Maumere: Penerbit Ledalero, 2004.
Gusti Madung, Otto. Politik Antara Legalitas dan Moralitas. Maumere: Penerbit Ledalero, 2009.
Baghi, Felix, ed. Pluralisme, Demokrasi, dan Toleransi. Maumere: Penerbit Ledalero, 2012.
Ceunfin, Frans, ed. Hak-Hak Asasi Manusia, Pendasaran dalam Filsafat Hukum dan Filsafat Politik. Jilid 1. Maumere: Penerbit Ledalero, 2004.
Mashitoh, Dwi Nur. “Jadi Negara Termiskin Cadangan Minyak Timor Leste Kering.” UniquediAnd Funny Videos. ˂https://www.google.com/amp/s/sosok gr…˃. Asesu iha dia13 Julho 2020.
Fakta, Data. “Timor-Leste Negara Termiskin di Asia Tenggara.” ˂https://youtu.be/K_krzGNbJKg˃. Asesu iha dia 22 Setembro 2020.
Waktu, Lintas. “Timor-Leste Menyesal Merdeka dari Indonesia.” ˂https://youtu.be/F6wiwICJB5c˃. Asesu iha dia 13 Abril 2020.

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 4 Dezembru: Kazu Pozitivu 1 & Rekuperadu Nain 1

DILI, STLNEWS.co - Ohin loron, Sabadu (04/12/2021), Kordenadora Jeral Surtu Covid-19, Ministeriu Saude Timor Leste deteta tan kazu pozitivu ida (1) no rekuperadu nain...

PR Periodu 2022-2027 Presiza Tau Interese Ba Estadu & Povu TL

DILI, STLNEWS.co - Prezidente Republika (PR) ba periodu tinan 2022-2027 atu ukun husi se deit presiza mak tau interese ba estadu no povu Timor...

Lidera Enkontru G7+ Iha Lisboa, Xanana Kontinua Promove TL Ba Mundu

PORTUGAL, STLNEWS.co - Lider karismatiku Xanana Gusmão, nu'udar mos pesoa eminente g7+ kontinua promove Timor Leste ba mundu liu husi g7+, bainhira hamutuk ho...