Membru Governu Balu Husi Dili Ba Partisipa Festa Iha Liquica

DILI, STLNEWS.co – Governu liu husi reuniaun Konsellu Ministru (KM) iha semana kotuk liu ba aprova ona projetu rezolusaun governu nian hodi implementa hikas Konfinamentu Obrigatoriu (KO) ba populasaun Munisipiu Dili, nunee bandu ema hotu atu lao sai husi uma ka Munisipiu Dili inklui sira neebe simu ona vasina doze daruak. Maibe  iha implementasaun KO nee membru governu balun la obedese no sai husi Dili ba partisipa festa iha Munisipiu Liquica.

Tanba nee akademista no atual Reitor Universidade da Paz (UNPAZ), Adolmando Amaral lamenta ho atitude membru governu sira neebe partisipa iha festa nee, tanba governu hasai rezolusaun hodi implementa KO atu ema hotu lao tuir, laos sulan tia povu membru governu sira kontinua lai tuir nia hakarak.

“Hau hanoin governu tenke seriu iha nia desizaun bainhira nia hakarak aperta ema hotu – hotu tenke kumpre, tanba rezolusaun neebe mak governu liu husi reuniaun Konsellu Ministru nee hamosu nia intesaun atu proteje ema hotu labele sulan povu, depois fo livre fila fali ba membru governu sira lao sai husi Dili ba partisipa festa, nee hanesan hahalok neebe la diak husi membru governu sira,” dehan Adolmando liu husi telefone, Segunda, (30/08/2021).

Akademista nee afirma, ho akontesimentu nee VIII governu konstituisional hahu demonstra hela sira nia inkapasidade ba povu, tanba husi rezolusan neebe mak sira hamosu iha Estadu Emerjensia, Serka sanitaria no konfinamentu obrigatoriu nee la iha inovasaun foun ida ba forma sira nee.

Tanba nee sira nafatin mantein ho forma ida neebe mak uza lao ona iha tempu naruk nia laran, maibe nia rezultadu nee povu ladun sente nia efeitu.

“Tanba nee hau nia hanoin governu tenke hanoin ona forma neebe foun hodi implementa, hanesan buka aprende referensia husi nasaun seluk tuir nesesidade neebe dadaun nee ita nia nasaun hasoru, laos ba adopta forma ida neebe hakarak aperta deit populasaun sira no iha fim nia efeitu la iha, ita gasta osan barak no soe tempu barak, tempu nee lao nafatin no ita mos la aproveita tempu sira nee ho atividade produtividade sira,” afirma nia.

Antes nee Ministru Prezidensia Konsellu Ministru (MPKM), Fidelis Leite Magalhaes hatete, iha semana hirak ikus nee, rejista ona situasaun pandemia Covid-19 iha nivel nasional neebe agrava ho konfirmasaun ezistensia variante Delta iha nasaun no ho numeru infetadu, baixa, kazu grave husi moras no mate neebe hahu aumenta.

Tanba nee ho numeru infeitadu no kazu grave husi moras mate neebe hahu aumenta, mak governu husu ba sidadaun sira neebe mak kompleta ona vasina dala rua atu tur hakmatek iha uma.

“Hahu Kinta kalan oras 23:59 to’o loron 2 fulan Setembru 2021 ita sei implementa KO iha Munisipiu Dili, no medida nee abranje hotu ba sidadaun sira neebe mak hela iha Dili inklui mos sira hotu neebe mak kompleta vasina doze darua, no sira neebe seidauk, atu hakmatek iha uma durante KO,” dehan MPKM Fidelis.*

Reportajen: Alberto Menezes

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL Setembru: Kazu Pozitivu 32 & Rekuperadu 83

DILI, STLNEWS.co - Sentru Integradu Jestaun Krize (SIJK) ohin relata kazu pozitivu iha ema nain 32 no rekuperadu hamutuk 117. "Kazu detetadu foun neebe relata ohin loron...

MTKI Loke Kompetisaun Pintura

DILI, STLNEWS.co - Ministeriu Turizmu Komersiu no Industria (MTKI), liu husi Diresaun Nasional Emprendismo ba Atividade Produtus Turistiku organiza kompetisaun pintura ba joven sira. Grupu...

Remata Nia Misaun Iha TL, Sitorus Despedida Ho WNI

DILI, STLNEWS.co – Embaixador Indonezia ba Timor Leste (TL), Sahat Sitorus ho nia espoza Bintang Vera C. Sitanggang, neebe durante tinan 4 ho balun...
%d bloggers like this: