Membru PN Presiza Hatais Farda Uniform

Xefe Bandaka CNRT, Duarte Nunes. (Foto: STL/Donaciano Magalhães)

DILI, STLNEWS.co – Nuudar orgaun soberania ida, tempu too ona ba deputadu no deputada sira tenke hatais farda uniform. Atu nunee, sira nia performansia iha sosiedade niat leet bele diferente uit oan no hatudu dignidade instituisaun PN nuudar orgaun soberania ida.

Responde kestaun nee, Xefe Bandaka CNRT, Duarte Nunes hatete, farda uniformidade ba membru PN, labele ba deit membru Bankada Fretilin, entretantu ba membru bankada opozisaun, hatais livre.

“Ida nee ami lakohi. Deputadu-deputada laos labarik estudante, bainhira lao sai, ema dehan tanba sa deputadu sira lao pasiar iha merkadu. Lolos nee, deputadu-deputada tenki uza farda uniform. Ho farda nee, iha kontrolu sosial. Tanba nee, deputadu-deputada atu ba fatin ida, tenke fardadu,” hatete Duarte Nunes iha uma fukun PN, Dili, Kinta (21/1/2021).

Iha fatin hanesan membru Bankada Fretilin, Jose Paiseco hatete, durante nee publiku kestiona, tanbasa membru PN laiha farda uniform (seragam dinas deputadu-deputada). Tuir lolos tenki iha farda uniform, hodi dignifika PN nuudar orgaun soberania ida.

Iha fatin hanesan, membru Bankada PD, Adriano do Nascimento hatete, atu koloka farda ba membru PN tenki haree ba kontestu saida. Karik iha kontestu ida, para ema haree hodi hatete katak, nee deputadu.

Karik iha kontestu atu mobiliza ka atu halo sirkulasaun osan hodi sosa tais produtu Timor Leste nian hodi halo farda, nee laiha buat ida. “Maibe atu halo kazaku ho didiak, entaun hein lai, tanba kestaun agora nee, ita atu defende moris,” dehan Adriano do Nascimento.

Reportajen: Domingas Soares/ Guilhermina Franco
Editora: Carme Ximenes

LEAVE A REPLY

Please enter your comment!
Please enter your name here