Membru PNTL 40 Aranka Ba Munisipiu Covalima

Membru Polisia Nasional Timor-Leste (PNTL) inklui kondutor ohin loron Tersa (02/03/2021), aranka ba Munisipiu Covalima. Hatete Adjunto Estadu Maior Koordenador, Marcos Sequeira ba jornalista sira iha CCD. (Foto: STL/Jeniche da Costa)

DILI, STLNEWS.co – Membru Polisia Nasional Timor-Leste (PNTL) inklui kondutor ohin loron Tersa (02/03/2021), aranka ba Munisipiu Covalima. Hatete Adjunto Estadu Maior Koordenador, Marcos Sequeira ba jornalista sira iha CCD.

“Ohin ita halo preparasaun ba membru PNTL hamutuk 40 pesoas inklui kondutor nain 12, aranka ba Munisipiu Covalima,” nia hatete.

Nia dehan, PNTL nian 40 ho kareta 13, maibe kareta 7 mak ba, depois kareta hitu nee sei fila-fali mai Dili, kareta 6 maka sei mantein iha neeba.

“Determinasaun ba tempu nee ita seidauk hatene, agora nee ita fokus bainhira mak situasaun Covid-19 nee normal fila-fali iha Timor laran tomak, ida nee mak orden mai depois haruka sira fila mai Dili,” nia esplika.

Tanba oras nee dadaun nasaun presiza PNTL, tanba nee husi Sentru Integradu Jestaun Krize (SIJK) haruka membru PNTL sira tenke aranka ba Munisipiu Covalima, no oras nee dadaun sira prontu atu aranka, maibe sira presiza deit mak prepara kapa udan nian, maibe fasilidade sira seluk karik ba ou bain rua mak sira presiza depois lori tuir fali.

Nia afirma, sira nia servisu prinsipal mak cek poin, iha area hotu-hotu iha Suai laran, i bandu ema atu tama no sai mai Dili, ida nee mak sira nia misaun, durante sira iha Munisipiu Covalima.

“Tanba tuir lei katak, iha situasaun saida deit, F-FDTL no PNTL sempre hamutuk, para oinsa fo seguransa masimu ba ita nia nasaun no povu ida nee, to’o pendemia Covid-19 laiha,” nia afirma.

Entertantu ohin membru Polisia Nasional Timor-Leste (PNTL) hamutuk ho UPF hodi aranka ba Munisipiu Covalima ho kareta 13.

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here