DILI, STLNEWS.co – Timor Leste (TL) atu adere ba ASEAN labele halo kompetisaun ho nasaun seluk, tanba sei menus rekursu umanus.
Lia hirak nee hatoo husi Diretor Ezekutivu Timor Leste, Coalition For Education (TLCE), Jose Monteiro ba STL, Kinta nee (04/05/2023).
“Ita tenki honestidade, hau fiar ita laiha kapasidade, ita menus rekursu umanus, maibe nee dezafiu ida, no sei fo motivasaun mai TL, tanba nee hau konkorda bainhira ita tama ASEAN lalais liu, depois ita hetan dezafiu, maibe ita nian rekursu umanu labele kompete. Iha rai laran mos ita nunee deit ona, husi parte edukasaun nian ita tenki prepara rekursu umanu, kompetisaun iha neebe, kampu trabalhu, inovativu no kreatividade, ita labele kompete bainhira ita nian konhesimentu natoon deit atu halo kompetisaun,” dehan nia.
Nia afirma, lo-loos iha avansus diak, tanba bele koalia lingua 4 hanesan tetum, portugues, english no lian indonezia, tanba iha ASEAN nee TL mesak deit mak koalia lingua haat, maibe lian haat nee nein lian ida mak koalia ho los liu, nein atu konsege domina lian ida, tanba domina lian haat nee kahur malu deit.
“Maibe diak, ita bele halo esforsu maibe ho rekursu umanus neebe mak menus ita seidauk bele halo kompetisaun, entaun ita presiza iha rekursu umanus, se ita menus rekursu oinsa mak ita bele halo kompetisaun,” katak nia.
(jac)
