Mericio: Labele Fiar Boatus

Sekretariu Estadu ba Komunikasaun Sosial, Mericio Juvinal dos Reis "Akara". (Foto: SEKOMS)

DILI, STLNEWS.co – Sekretariu Estadu ba Komunikasaun Sosial, apela ba sidadaun hotu atu labele fiar boatus kona ba konjelamentu fundu petroleo.

Informasaun nee hatoo husi Sekretariu Estadu ba Komunikasaun Sosial, Mericio Juvinal dos Reis “Akara” liu husi komunikadu imprensa iha Gabinete Palasiu Governu Dili, Kuarta (23/09/2020).

Akara hatete, relasaun entre governu Timor Leste ho governu Estadus Unidus Amerika lao ho diak no laiha problema, nunee nasaun rua nee kontinua respeita malu no mantein kolaborasaun neebe diak.

Liga ba asesu fundu petroleo, Akara afirma katak iha nia lei no regra rasik neebe mak governu Timor Leste kumpri, nunee too oras ida nee sistema sei funsiona normal.

“Boatus ka HOAX sira nee ita labele dezenvolve iha ita nia rai tanba ida nee estraga ita nia harmonia sosial no komunikasaun iha ita nia nasaun. Ita hatene katak Estadus Unidus Amerika nasaun ida neebe boot la hanoin kloot hanesan boatus sira lao nee,” Akara hatete.

Membru governu nee husu ba populasaun sira hotu antes atu konsumu informasaun neebe mak fo sai husi fontes neebe deit tenke tetu didiak no haree didiak ba informasaun nee los ka laloos, no tenke verifika husi midia ka fontes ida neebe mak fo sai.

SEKOMS husu ba ema hotu atu konsumu informasaun ruma tenke konsumu informasaun husi fontes kredivel sira, hanesan midia profisional sira ka fontes governu nian. Nunee governante nee apela ba povu atu labele paniku ho HOAX ka boatus sira neebe espalla iha komunidade liu husi midia sosial.

Reportajen: Blandina Mauno

Editora: Carme Ximenes

LEAVE A REPLY

Please enter your comment!
Please enter your name here