Mesin AE Avaria, Pasajeirus Nakroma Fila Iha Tasi Klaran

Ro Berlin Nakroma tula pasajeirus atu halo viajem husi Dili ba Oecusse, maibe mesin AE avaria iha tasi klaran, halo ro nee la konsege ba too iha neeba (Oecusse-red). (Foto: STL/Jacinta Sequeira)

DILI, STLNEWS co – Ro Berlin Nakroma tula pasajeirus atu halo viajem husi Dili ba Oecusse, maibe mesin AE avaria iha tasi klaran, halo ro nee la konsege ba too iha neeba (Ocusse-red).

Prezidente APORTIL, Flavio Cardoso Neves hatete, ro nee sai husi nee ho pasajeirus neebe barak, atu bele selebra natal ho tinan foun hamutuk ho familia iha Oecusse, maibe tanba ho mesin AE neebe avaria, ro Berlin Nakroma, tama ona iha area Liquisa, tenke ho pasajeirus fila-fali mai Dili, tanba haree ba kondisaun ro Nakroma nian, neebe mesin AE avaria.

“Primeiru sira sai husi nee ba too iha parte Liquisa nian dehan, mesin AE avaria uituan entaun hau halo kordenasaun katak, sekuandu haree ba situasaun oinsa diak liu sira fila, duke sira ba liu iha klaran buat ruma akontese sei at liu tan, tanba nee ita esforsu oinsa mak sira mai fali iha Dili, bele identifika ohin kalan, ninia kauza husi mesin AE nee iha parte saida, tanba nee agora sira sei identifika, depois solusaun ba problema nee halo nusa, tanba pasajeirus barak mak sosa ona tiket, entaun ita tenta ona organiza diak, ho ro Success, tanba aban ninia orariu atu ba Oecusse,” dehan Prezidente APORTIL Flavio ba STL, hafoin observa direita kondisaun ro Nakroma, iha Ponte Kais, Segunda kalan (21/12/2020).

Nia dehan, ho kondisaun ro nakroma nian sira sei buka meus nafatin, tanba pasajeirus sira nee sosa ona tiket ho ida nee, karik mesin AE ida nee seidauk diak entaun pasajeirus sira sae fali Success, se kondisaun ro Nakroma diak ona, ro rua nee bele aranka hotu ba Oecusse.

“Ho kondisaun ita haree ema barak,entaun oinsa mak bele prepara aihan ruma, maibe ohin dehan, atu aluga kareta, para lori ema sira nee ida-idak ba nia uma, dala ruma sira iha nee, tanba sira balun hakarak toba iha nee, depois ita tenta buka hahan no bee ruma, para ohin kalan sira bele han iha nee, maibe aban sira bele ba fali, tanba ita garante ba iha roo success, se ohin kalan nee ita konsege rezolve kedas,hau hanoin roo rua nee bele ba dala ida deit.

Hau hanoin failansu ida nee sira mos ladun detekta hetan, maibe too iha dalan klaran mesin nee mate derepenti deit, ho ida nee ohin hau mai dereita, para kestaun ida nee,” tenik nia.*

Reportajen: Jacinta Sequeira
Editora: Carme Ximenes

LEAVE A REPLY

Please enter your comment!
Please enter your name here