Midia TL Lutu Dala Ida Tan, Jornalista Joao Basilio da Costa Husik Ona Mundu

DILI, STLNEWS.co – Situasaun tristeza hafalun fila fali komunidade midia Timor Leste (TL) hodi lutu dala ida tan.

Hafoin husik fotografu profesional Guido Sam Martins alias Samday, Aman Maromak bolu tan jornalista, Joao Basilio da Costa hodi fila hikas ba Nia Kadunan Santu. Ba dahuluk, iha fulan Junhu 2021, Maromak bolu hikas jornalista senior Meta Guterres.

Matebian Joao Basilio da Costa neebe bai-bain bolu ho naran Jojo Laga Mata-Jojo Baratu, hakotu nia iss iha nia loja area Delta 3, Suku Komoro, Postu Administrativu Dom Aleixo, Munisipiu Dili, Sesta (16/7/2021) iha horas 13.00 OTL.

Tuir informasaun neebe diariu nee rekoilla iha mate uma hatudu katak laiha ema ida mak hatene matebian hakotu nia iss. Matebian toba mesak iha nia kuartu iha loja laran. Matebian nia fen kaben hela iha foho seidak fila mai Dili.

Iha Sesta dadersan, familia lori hahan matabisu nian ba matebian, maibe tamba matebian nia odamatan save iha laran, hahan matabisu lori fila fali ba sira nia uma neebe besik hela matebian nia loja.

To’o meudia, matebian seidauk hader, maka familia no vizinhu sira hakfodak, bainhira sira obriga loke odamatan, matebian nia iis laiha ona no matebian husik ona mundu hodi fila hikas ba Aman Maromak Nia Kadunan Santu.

Aida hanesan vizinhu matebian fo sasin katak iha Kinta (15/7/2021) maizumenus horas 21.00 OTL, matebian sei sosa sigaru lolon ida no pulsa telefone iha sira nia loja neebe hateke malu ho matebian nia loja.

“Hori kalan (Kinta-Red.) maun Jojo sei sosa sigaru lolon ida no pulsa telefone iha ami nia loja. Ami hakfodak ohin meudia rona katak maun Jojo hakotu ona nia iis iha nia kuartu,” dehan Aida.

Tuir Aida, matebian iha matebian nia loja nee faan deit sasan uma laran nian, hanesan bikan, kanuru no sel-seluk.

“Bainhira seidauk mosu pandemia covid-19, matebian faan sasan uma laran nian nee iha Hera, Liquica no fatin sel-seluk, maibe ho situasaun emerjensia ne’e, matebian faan sasan uma laran nian nee iha nia loja deit,” dehan Aida.

Jornalista senior Armandina Moniz neebe mai iha mate uma, fo sasin katak, nia sosa sasan barak hosi matebian. “Hau sente triste tebes rona katak maun Jojo mate tiha ona,” tenik nia.

Nune’e mos jornalista antigu Otelio Ote hateten komunidade midia lutu dala ida tan. “Ita foin husik maun Samday, ohin ita husik tan maun Jojo. Dep hau nia estudante jornaliszmu favoritu. Bainhira nia mai tuir formasaun jornalizmu baziku iha tinan 2001, hau husu tambasa hakarak partisipa formasaun jornalista? Nia resposta katak “Hau hakarak atu hatene deit mundu jornalista, laos hakarak sai jornalista,” hakerek Otelio Ote iha nia wall facebook.

Otelio Ote hateten, matebian sai duni jornalista. Hahu iha Timor Post iha tinan 2002. Husik tiha Timor Post, matebian harii Radio ida no tuir mai harii Grupu Rebenta. “Joven talentu no kreativu, tambasa husik hela mundu nee sedu liu,” hakerek Otelio iha nia wall facebook.

Eis Diretora Timor Post, Santina Araujo iha nia wall facebook hateten nia sente tristi tebes rona informasaun Jojo Laga Mata laiha ona.

“Hau nia belun e alin Jojo Laga mata, iha loron Tersa o sei ba kantor Timor Post. Ida nee kala visita ikus nian. Iha loron Kinta ita rua sei hakilar malu bainhira hau liu hosi o nia uma oin, ida nee kala loron ikus ita hase malu. Alin ita servisu hamutuk iha Timor Post iha tempo naruk. Hau koinese o Jojo iha tinan 2002 bainhira tuir kursu jornalismu iha Timor Post turno dahuluk. Alin o to oona rohan, Descansa Em Paz no hakmatek iha Lalehan,” hakerek Santina iha nia wall facebook.

Iha Sesta lokraik, hafoin rona Jojo husik ona mundu, jornalista hosi midia printing no midia elektronik nadodon mai mate uma hodi hato’o sentidu kondolensia ba familia matebian atu korajen nafatin hasoru situasaun teristeza ida nee. Reza, kanta no tanis hodi hafalun situasaun tristeza iha mate uma.

Tuir planu, Sabadu (17/7/2021), matebian sei lori ba nia fatin moris, Postu Administivu Laga, Munisipiu Bauxau hodi halao serimonia vuneravel tuir kultura Timor nian.*

Reportajen: Mikael Mali Mau
Editor: Mikael Mali Mau

LEAVE A REPLY

Please enter your comment!
Please enter your name here

NEWS UPDATE

Covid-19 Update (29 Jullu 2021): Numeru Pozitivu Kontinua Aas Iha Ermera

DILI, STLNEWS.co - Loron Kinta (29/07/ 2021), Centru Integradu Gestão de Crises, Sala Situação (CIGC-SS / SS-SIJK) rejistu tan kazu konfirmadu pozitivu Covid-19 hamutuk...

Nobel da Paz Prepara Materia Ba Ezame

DILI, STLNEWS.co - Eskola Ensinu Sekundariu Nobel da Paz, prepara ona materia ba estudante sira, atu tuir ezame segundu periodu ano letivu 2021, neebe...

IFFS Reativa Aula Prezensial

DILI, STLNEWS.co - Reitor Instituto Filosofico Sao Francisco de Sales (IFFS), Pe. Manuel Pinto hatete, reativa aula prosesu aprendizajen, tanba lakon tempu barak ona...
%d bloggers like this: