DILI, STLNEWS.co – Organizasaun Sosiedade Sivil liu husi Luta Hamutuk husu ba militante no estrutura Partidu FRETILIN, atu tur hamutuk buka solusaun ba derotan iha eleisaun parlamentar, no evita kria instabilidade.
Diretor Ezekutivu Luta Hamutuk (LH), Jose Alves da Costa hateten, militante Partidu FRETILIN husu ba lideransa Partidu FRETILIN liu-liu Sekretariu Jeral no prezidente atu rejigna aan, tanba haree ba derota partidu nian iha eleisaun parlamentar 2023, nee tanba konsidera falhansu husi lideransa sira.
Tanba nee, konaba militante sira husu estrutura Partidu FRETILIN rejigna aan, nee depende ba rejimentu husi partidu nian.
“Maibe sosiedade sivil husu labele utiliza insatisfasaun ida nee hodi kria instabilidade liu-liu ba sosiedade, tanba formalmente kuandu instabilidade mosu iha partidu, militante idak-idak ho nia lideransa hotu-hotu iha apoiantes, ita lakohi para iha disturbasaun ruma neebe mak akontese iha partidu laran no afeita ba publiku,” dehan Diretor Ezekutivu Luta Hamutuk (LH), Jose Alves da Costa ba STL iha nia knaar fatin Palapasu, Kuarta (28/06/2023).
Nia hatutan, militante no estrutura partidu atu tur hamutuk, koalia ba malu oinsa mak atu rezolve problema internal nee, no labele lori ba liur dada ema seluk hodi aproveita kria instabilidade iha kapital Dili.
Antes nee eis membru Comite Central FRETILIN (CCF) Agustinho Somotxo informa, sei kontinua luta ba demisaun lideransa Partidu FRETILIN atual, uluk too agora nafatin lidera too halakon FRETILIN iha eleisaun parlamentar.
Nia hatete, konaba sira nia ezijensia nee, problema internu, maibe sai ona iha publiku i jornalista sira mos halao kobertura. Bainhira nia parte livre, livre mos halao servisu ba ida nee.
“Ami kondena malu, sira konsidera hau violador ba estatutu partidu, maibe situasaun derota permanente atu hakoi partidu, hau la aseita”, dehan nia ba jornalista sira iha PN, Kinta (15/06/2023).
(alb)
