MJ – Komisaun A Koalia Lei Asosiasaun Publika Prof-Ordem Advogadus

Ministru Justisa, Manuel Carceres da Costa. (Foto: Media MJ)

DILI, STLNEWS.co – Ministeriu Justisa (MJ) hatoo proposta lei 2 ba komisaun A, trata asuntu konstitusionais no justisa Parlamentu Nasional (PN), konaba asosiasaun publikas profisionais no ordem dos advogadus, hodi regula ka sai sumbrina ba area refere.

Ministru Justisa, Manuel Carceres da Costa hatete, ohin mai hasoru komisaun A PN, halo audensia publiku konaba lei 2, ida konaba lei asosiasaun publikas profisionais no lei ida seluk konaba ordem dos advogadus. Ohin haree ba estrutura no regras lejislativa iha lei nee konfirma ho regras sira, atu bele hamosu lei nee. Neebe ohin komisaun A fo apresiasaun, no sei konvoka fali MJ hanesan ministeriu proponente atu ba deskute klean liu iha espesialidade.

“Husi lei 2 nee nia substansia, mak atu regula asosiasaun publikas profisionais, no ida seluk ordem dos advogadus, nee atu regula advogadus Timor-Leste nian, tanba too agora Timor iha advogadu privadu, nunee iha mos advogadu estranjeiru sira neebe halo advokasia iha ita nia rain”, informa membru ezekutivu nee ba jornalista, bainhira remata audensia ho komisaun A iha sala komferensia PN, Dili, Kinta (04/03/2021).

Nia esplika, lei ba asosiasaun publikas profisionais, atu bele sai sumbrina ida ba iha asosiasaun publika profisionais sira, neebe eziste tiha ona, neebe sira nee eziste ona ba halo rejistu deit iha notariadu tuir dekretu lei numeru 5.

Neebe tenke halo lei ida sai sumbrina para regula sira i bele hamosu ordem hanesan, medikus Timor-Leste, asosiasaun dos infermeirus, parteiras, no seluk tan neebe presiza lei ida atu regula sira nia ezistensia iha Timor.

Lei ida seluk konaba ordem dos advogadus, ho nia estatutu, tanba too agora Timor iha advogadu, i sira nee kria sira nia eskritoria advokasia nee barak, nunee iha mos advogadu estranjeiru sira neebe halo advokasia iha Timor, neebe agora iha deit dekretu lei ida mak regula advokasia privadu iha Timor, tanba nee presiza halo lei ida.*

Reportajen: Guilhermina Franco / Domingas Soares
Editor: Ekipa STL

LEAVE A REPLY

Please enter your comment!
Please enter your name here