DILI, STLNES.co – Movimentu Siviku Nasionalista Timorense (MOCNAT) kontinua afirma pozisaun apoia Kandidatu Prezidente Republika (PR), José Ramos Horta iha eleisaun prezidensial segundu ronde.
Deklarasaun nee hatoo husi Prezidente MOCNAT, Ete Uco Guterres katak, MOCNAT nafatin apoia kandidatu PR Ramos Horta iha eleisaun segundu ronde. I ida nee atu eduka povu katak siviku nasionalizmu, nunee ema hotu senti katak Timor nee ninian, hodi defende moris diak kontribui ba paz, estabilidade no dezenvolvimentu ba nasaun ida nee.
“Tanba deit interese nasional, Timor Leste nia kredibilidade monu iha nivel internasional, MOCNAT nafatin apoia Ramos Horta, i tuun ba baze sempre afirma, hili kandidatu neebe mak diplomatiku, José Ramos Horta,” katak Ete Uco ba STL, Sesta nee (08/04/2022) iha nia knaar fatin Balide.
Nia dehan, durante funu Ramos Horta ba nasaun hotu hodi luta diplomasia Timor nian iha mundu internasional, too ikus Timor ukun aan, i agora haree ba Timor infrenta situasaun impase politika, halo kredibilidade Timor nian tuun, tanba nee tenki hili Ramos Horta, atu nunee hadia fali Timor nia kredibilidade iha internasional.
Tuir nia, sira nafatin apoia Ramos Horta iha eleisaun segundu ronde, no mos sei nafatin apoia Xanana Gusmão iha eleisaun parlamentar.
(gui)
