Moras Diabetes, Hakotu Deputadu Guntur Nia Iis

Deputadu Sabino Soares "Guntur" husi bankada PLP, hakotu iis iha Hospital Nasional Guido Valadares (HNGV), tanba moras diabetes. (Foto: Espesial)

DILI, STLNEWS.co – Deputadu Sabino Soares “Guntur” husi bankada PLP, hakotu iis iha  Hospital Nasional Guido Valadares (HNGV), tanba moras diabetes.

Hernanio Agustino Soares hanesan maun hatete, familia sente triste tanba lakon familia ida neebe sai hanesan garantia ba familia laran.

“Ami sente triste tebes Deputadu mai baisa iha HNGV besik semana ida ho nia moras komplikadu tebes, ami familia foti desizaun halo amputasi ba nia ain, familia esforsu makaas atu nia bele rekopera, maibe lakonsege salva, tanba nia moras diabetes inklui sofre pulmaun bubu,” dehan nia ba jornalista sira, iha Mortuariu HNGV, Dili, Sabadu (23/01/2021). 

Nia afirma, durante nee deputadu Guntur moras komplikadu no matebian konsege baisa iha Intensive Care Unit (ICU), hodi halo tratamentu ba moras neebe matebian sofre durante semana ida no ohin hakotu iis.

Nia tenik husi familia, matebian sei entrega ba governu  tanba haree ba matebian ninia didikasaun tomak neebe durante nia sei moris. Nomos kontribuisaun ba prosesu libertasaun nasional. “Ami intrega ba governu para bele prosesu no ami familia hotu nafain akompania governu atu bele tau ba fatin neebe ho dignu,” tenik nia.

Matebian mate husik hela nia oan nain 5,  feto nain 1 no mane nain 4, maibe  nain 2 sei kiik,  nain 3  agora eskola hela.

Familia iha planu atu haloot iha ninia moris fatin suku Laleia, Makaloso Quelicai, maibe familia sei halo konfirmasaun uluk ho governu tanba  matebin ninia kontribuisaun neebe mesinoan ona.

Matebian iha maun alin nain 7 iha feto nain 1 no mane nain 6, aman Luis Soares, inan Sebastina husi matebian Guntur fila hotu ona ba aman maromak nia kaduna santu, maibe agora hela sira nian 2 deit ona.

Matebian nee ho nia istoria neebe naruk tebes, durante joven nia didika nia aan tomak ba iha prosesu libertasaun nasional nia hetan turturasaun makas no nia tama prizaun durante tinan 3 nia laran iha tempu Indonezia.

Depois ida nee nia iha liur deit nuudar ativista ida CPD RDTL, nuudar ativista ida nia involve  aan bainhira Partidu PLP moris. Nia mos ema ida neebe iha partidu PLP nia laran hodi kontribui ba partidu PLP, depois metebian hetan konfiansa husi partidu PLP  sai nuudar deputadu.

Matebian iha familia 2 tanba nee sei lori ba iha Liquisa vizita tiha, depois lori fali mai iha matebian nia uma Aimutin hodi hein bainhira governu deside lori ba Quelicai iha knua fatin, karik iha posiblidade atu halot matebian iha Metinaro .*

Reportajen: Domingas Soares / Guihermina Franco

Editora: Carme Ximenes

LEAVE A REPLY

Please enter your comment!
Please enter your name here