Movimentu Luta Libertasaun Loke Espasu Hamoris Emansipasaun Feto

DILI, STLNEWS.co – Koordenador Comissão de Pesquisa e Elaboração da História da Luta da Mulher Timor, Nuno Rodriguez Tchailoro hatete husi movimentu luta libertasaun mak loke espasu hamoris emansipasaun feto.

Koordenador Comissão de Pesquisa e Elaboração da Historia da Luta da Mulher Timor, Nuno Rodriguez Tchailoro hatoo kestaun nee liu husi diskursu bainhira halo lansamentu ba livru Buibere Hamriik Ukun Rasik Aan iha Palasiu Prezidente Bairru Pite, Kinta kalan (10/06/2021).

“Movimentus luta libertasaun nasional loke espasu hodi hamoris emansipasaun feto. Movimentu feto mosu husi luta libertasaun nasional. Fundador nasaun nian hatuur ona libertasaun nasional signifika laos deit libertasaun patria no povu, maibe libertasaun feto husi diskriminasaun oin-oin. Vise Prezidente FRETILIN, Nicolau Lobato iha 1974 hateten “liberta povu la ho liberta feto nuudar obra inkompleta. Haluha papel feto iha tarefa libertasaun povu hanesan halo despreza kontributu importante husi forsa sosial boot iha mundu modernu. A forma a mulher se libertar é participar,” dalan atu feto liberta nia aan mak partisipa.” hatete Nuno.

Koordenador nee hatutan programa polítiku partidu nian loke dalan ba partisipasaun feto ninian. Iha prosesu revolusaun, FRETILIN organiza povu nuudar autor ka sujeitu ba ninia libertasaun rasik no patria liu husi partisipasaun iha programa alfabetizasaun, edukasaun, creche, produsaun, saude, seguransa no luta armada neebe hahu molok okupasaun Indonezia neebe akontese iha fatin balun deit, depois kontinua iha zona libertadas hodi haluan liutan partisipasaun povu tomak iha revolusaun.

“Oinsa feto bele partisipa iha atividade polítika se la kore-an husi tirania domestika? Ohin loron ita sei kontinua enfrenta ida nee. Nuudar ezemplu, programa OPMT harii creche hodi tau matan ba oan. Tau matan ba oan konsidera nuudar serbisu domestika no feto nian, maibe iha creche transforma tiha serbisu neebe konsidera nuudar domestika no feto nia tarefa sai serbisu publiku, creche transforma mane sira iha responsabilidade hanesan ho feto sira hodi tau matan ba labarik. Pratika emansipasaun ohin loron kontinua relevante tanba feto barak ohin loron labele sai husi esfera domestika tanba tau matan ba labarik konsidera nuudar feto nia knaar.” hatete nia.

Nuno hatutan Iha zonas libertadas, feto no mane hotu-hotu partisipa iha programa revolusionariu sira. Kuadru sira hetan formasaun polítika no ema hotu-hotu konsientilizadu, ema neebe la hatene lee no hakerek tuir alfabetizasaun, ferik sira neebe tanba idade labele halao atividade produsaun responsabiliza ba seguransa iha aldeia. Ajente sanitariu neebe menus hetan formasaun atu halao serbisu saude nian.

Doutor pe-descalso mobiliza atu tau matan ba povu nia saude, daia sira fo partus ba inan isin-rua. Feto hotu-hotu mobilizadu iha nivel sektor, zona, suku no aldeia. Ema hotu-hotu konxientilizadu no hatene ida-idak nia kontribuisaun ba luta libertasaun nasional. Feto sai autor ba luta libertasaun nasional no emansipasaun.

Esperiensia tinan-tolu iha ai-laran sai fundasaun prinsipal ba luta libertasaun nasional no ba emansipasaun. Iha zona okupada, ho inisiativas rasik, feto hahu halao atividade klandestina hodi fo apoiu ba luta armada desde 1976. Figura prinsipal ida mak neebe bele temi iha nee mak Maria Gorrete ho nia feto maluk sira hanesan Ines Lay halibur hahan, medikamentus, surat-tahan, lapijeira no roupa haruka ba ai-laran.

Situasaun foun neebe feto hasoru, hafoin zona libertadas rahun, labele kontinua programa revolusionariu sira, feto buka nia dalan hodi kontinua fo apoiu luta hasoru okupasaun Indonezia. Feto halibur nia família sira hodi fo apoiu ba luta armada, klandestina no diplomatika. Husi uma feto mobiliza apoiu lojístika, fo protesaun ba luta armada no klandestina, uma sai kaixa no tratamentu saude. Feto buka nia dalan hodi okupa espasu publiku iha servisu fatin, igreja, eskola, universidade hodi mobiliza apoiu, sosializasaun polítika, hetan no distribui informasaun kona-ba inimigu no mobiliza malu halo manifestasaun kontra okupasaun Indonezia.

Iha luta armada, iha planu atu harii destakamentu femininu, hahu halo rekrutamentu ba feto no hetan formasaun sobu no monta kilat, soe granada, tiru defensiva no ofensiva. Iha membru OPMT balun mak lori kilat no partisipa iha operasaun militár. Feto partisipa iha seguransa ninian iha Forsa Auto Defeza ka armas brancas hodi tau matan ba seguransa aldeia nian. Iha tempu guerrilla feto iha papél importante ba apoiu lojístiku, edukasaun polítika ba membru FALINTIL, makeira no halo ligasaun ho klandestina, iha kazu balu feto envolve iha asaltu no foti desizaun ba asaltu kontra militár Indonezia.

Iha Frente Diplomatika, feto kontinua halakan ahi luta ba ukun rasik-an iha Portugal, Mozambique, Australia no Kanada serbisu hamutuk ho solidariedade internasional liu husi kampaña, manifestasaun, produsaun, diseminasaun informasaun no aprezentasaun kultural.*

Reportajen: Emerencian Pinto
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun; EP1

STLNEWS.co – Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun • EPISODE 1: Drama Kakaluk Ba Corona https://youtu.be/VQBkF8ES8GE • dr. Odete Maria Freitas Belo,...

TL Seidauk Tempu Ba Expo Dubai

DILI, STLNEWS.co - Timor Leste atu partisipa iha Expo Dubai, maibe haree ba situasaun agora povu sofre ba situasaun Covid-19 no kalamidade, tanba nee...

Akontesementu Meza PPN Rahun; MP Notifika Deputadu CNRT Nain 8

DILI, STLNEWS.co - Relasiona ho akontesementu meza Prezidente Parlamentu Nasional (PPN) rahun iha loron 18-19 Maiu 2020, Ministeriu Publiku (MP) fo ona karta notifikasaun...
%d bloggers like this: