MTK Garante Sei Rezolve Sumafro

DILI, STLNEWS.co – Ministru Transporte Komunikasaun (MTK) Jose Agostinho da Silva hateten, sei hadia Sumafro iha kapital Dili, antes serimonia invsestidura ba prezidente foun no loron restaurasaun independensia 20 fulan Maiu.

Sumafro iha kapital Dili neebe avaria ona mak hanesan sinais tranzitu neebe dadun nee avaria iha Aitarak Laran Palasiu Prezidente nian oin, iha loja Kolmera oin no Igreja Katedral nia oin.

“Ita espera too momentu komemorasaun sira nee ita nia sinais tranzitu sira nee bele aseguradu ona, nunee bele fasilita movimentu transporte rodaviaria sira,” dehan MTK, Jose Agostinho da Silva ba jornalista sira iha uma fukun Parlamentu Nasional, Tersa nee (10/05/2022).

Governante nee afirma, haree ba sumafro iha kapital Dili neebe balu hahu avaria ona, tanba nee atu halo manutensaun ba sumafro hirak nee, governu liu husi MTK loke ona konkursu publiku, maibe kompania sira la iha interese.

Tanba nee, MTK iha tempu badak sei halo ajudikasaun direita ba kompania balu hodi halo manutensaun ba sumafro hirak neebe avaria ona.

Entretantu, governante nee la sita konaba total orsamentu hirak mak MTK preve ona hodi halo manutensaun ba sumafro neebe mak avaria ona iha kapital Dili.

(alb)

LEAVE A REPLY

Please enter your comment!
Please enter your name here