DILI, STLNEWS.co – Munisipiu Dili konsege rekolha reseita ho montante US$ 8.438.552 husi atividade publisitaria ba kofre estadu.
Kestaun nee hatoo husi Koordenador Servisu Lisensiamentu Publisitaria iha Munisipiu Dili, Julio Fonseca Lopes do Rosario ba jornalista sira iha nia knaar fatin, Kinta ne (28/07/2022).
“Fulan Janeiru too Julhu tinan nee, ita rekolha reseita ho montante US$ 8.438.552 husi atividade publisitaria hodi kontribui ba kofre estadu,” nia hatete.
Nia dehan, servisu nee bazeia ba dekretu lei no 51/2016 alterada ba lei no 31/2017, konaba mensajen lisensiamentu publisitaria nee hahu husi tinan 2017.
Iha parte seluk, Presidente TANE Konsumedor, Antonio Ramos informa, presiza halo sensibilizasaun diak ba operador ekonomika sira no konsumidor konaba lei sira, tanba iha publisidade balun bosok konsumidor.
Nunee mos, Estudante Universidade Nasional Timor Lorosae (UNTL), Zezito Fernander informa, publisidade neebe iha kapital Dili barak tebes, maibe ida nee diak ba nasaun tanba fo reseita neebe diak ba Kofre estadu.
(jen)
