Nakroma Iha Faze Manutensaun

Prezidente APORTIL, Flavio Cardoso Neves. (Foto: Madalena Horta)

DILI, STLNEWS.co – Dadaun nee Ro Berlin Nakroma iha faze manutensaun , tanba makina AE avaria, iha semana hirak liu ba.

Prezidente APORTIL, Flavio Cardoso Neves hatete, ro Nakroma ninia kondisaun agora dadaun makina AE avaria, ho ida nee presiza iha manutensaun, tanba ro ba pasajeirus sira kada tinan tenke halo manutensaun, laos husik avaria nunee deit lae.

“Solusaun agora ita tenta ona koordena ho ro Success, tanba roo Success mos iha planu atu ba halo manutensaun agora iha Malaysia, maibe ita koordena ho sira, ho tempu ida hanesan nee ita husu sira, oinsa mak ho situasaun nunee, sira bele fasilita ita,” dehan Flavio ba STL, iha portu Dili,Segunda (28/12/2020).

Prezidente APORTIL, Flavio sublina, manutensaun espesial nee tinan lima dala ida, tanba nee bainhira ro nee ninia kondisaun aat, nee presiza halo manutensaun neebe mak diak, agora dadaun sei halo manutensaun.

“Se makina ruma aat nee, hau hanoin ita tenke hadia, tanba nee risku no ita lori ita nian populasaun, tanba pasajeirus sira sae nee Timor oan, neebe ita garante katak, se labele hadia iha nee, ba hadia iha liur, atu nunee ro nee bele halo viajem husi Dili ba Atauro no Oecusse,” dehan Flavio.

Nia akresenta, APORTIL esforsu oinsa mak minimal fo fila buat rua,osan ruma para bele sustenta aan, buka meus oinsa mak nakroma bele sustenta nia aan rasik, laos governu mak lor-loron fo deit. Maibe dadaun nee roo nakroma sei halo manutensaun iha Timor, karik ba manutensaun nee la maximu, nee tenke iha planu lori ba liur.*

Reportajen: Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here