Nakroma Lahalo Operasaun Impaktu Povu Oecusse

Deputadu husi Bankada PD, Mariano Asanami Sabino. (Foto: Espesial)

DILI, STLNEWS.co – Reprezentante povu iha uma fukun Parlamentu Nasional (PN) preokupa ro Nakroma la halo operasaun, tan nee fo impaktu ba povu Oecusse atu mai halo tratamentu iha Dili, no Oecusse oan sira neebe hela iha Dili, labele ba tanba ro la tula.

Kestaun nee fo sai husi Deputadu Mariano Asanami Sabino liu husi sesaun plenaria, Segunda (18/01/2021) iha parlamentu Nasional.

“Ita hapara ona ro husi Oecusse mai Dili no husi Diii labele ba Oecusse tanba, razaun Covid-19 tan nee Oecusse oan balu mate, tanba la mai tratamentu iha nee, tan nee ba oin tenke halo kontrolu neebe rigorozu liu tan, maibe governu tenke halo tratamentu neebe diak ba Oecusse no Atauro oan sira, ita labele izola sira tanba ita rasik la hatene covid nee bainhira los maka atu para,” dehan Deputadu Asanami.

Nia mos informa liu tan katak, governu foti ona desizaun atu ro labele halo operasaun ba mai, tanba nee husu governu atu kontrola didiak fronteira sira nee, ho nunee labele fasilita ema tama illegal mai TL, tanba nasaun vizinu hanesan Atambua (Indonezia) afetadu tebes ba Covid.

Iha fatin hanesan Ministru Asuntu Parlamentares no Komunikasaun Francisco Jeronimo hatutan, liu husi Konsellu Ministru extraordinaria neebe halo iha loron Sesta semana nee foti ona desizaun ida katak, atividade iha Oecusse bele lao normal fali ona, tanba kazu tolu neebe foin dadauk pozitivu nee rekupera fali ona.

“Hau hanoin operasaun bele lao normal fali ona maibe ita nafatin lao tuir protokolu OMS katak, tenke distansia sosial, uza maskra no fase liman bebeik ho sabaun, tan nee ba oin transporte maritima laiha problema tanba ro halo fali ona nia operasaun,” responde Ministru.

Nia mos afirma liu tan katak, desizaun husi Konsellu Ministru katak, bele halo nusa ba mos fronteira sei la loke, tanba hare ba moras nee iha nasaun vizinu sira, numeru kontinua aumenta.*

Reportajen: Madalena Horta/Jacinta Sequeira
Editor: Ekipa STL

LEAVE A REPLY

Please enter your comment!
Please enter your name here