DILI, STLNEWS.co – Prezidente Autoridade Munisipiu Dili (PAMD), Guilhermina Filomena Saldanha Ribeiro husu ba negosiante ambulante sira neebe faan iha Largo Lesidere, labele dada lona hodi halo uma ki’ikoan toba iha neeba.
Nia hatete, vendadores ambulante iha Largo Lesidere laos muda sira husi fatin neeba, maibe husi sira iha tempu badak nee atu sobu lona neebe sira uza nee, sira bele faan sasan maibe labele uza lona, tanba sira balun toba iha neeba.
“Ita la muda vendedores sira neebe faan sasan iha Largo Lesidere, maibe ita husu labele uza lona, tanba ita haree sira uza lona depois toba tan iha neeba. Tanba fatin jardin nee laos atu toba,” hatete Prezidente Autoridade Munisipiu Dili (PAMD), Guilhermina Filomena Saldanha Ribeiro ba jornalista sira iha Komando PNTL Munisipiu Dili, Kaikoli, Kinta (03/08/2023).
Nia tenik, bainhira toba ona fatin neebe la adekuadu hakarak lakohi tenki sobu, maibe la duni sai. Husu para sira sobu sira nia fatin, hakarak faan sasan faon ho oras fila ho oras, labele toba iha neeba, tanba ida nee laos fatin atu toba no lori familia ba iha neeba halo uma ki’ikoan depois toba iha neeba.
“Ami la duni sai, husu sira atu organiza aan, faan sasan orariu neebe mak bele, tanba nee labele uza lona no toba iha fatin neeba, ida nee la diak,” nia informa.
Iha fatin ketak, Negosiante Ambulante Fernada Gomes esplika, sira faan iha neeba tanba nesisidade uma laran mak obriga, no dada lona atu halo mahon ba fatin para ema mai tur hodi hemu kafe ou han.
“Ami dada lona laos ami toba iha nee, maibe ami dada lona tanba ita haree tasi ibun nee ai mahon laiha, tanba nee ami dada lona para ema mai hola kafe ou nasi kotak hakarak han karik tur iha ai mahon nee hodi han,” nia informa.
(jen)
