DILI, STLNEWS.co – Negosiente merkadu Taibesi Domingas Monteiro husi Munisipiu Aileu hatete, sira la satisfas ho lixu neebe naklekar iha area merkadu Taibesi, tanba ida nee fo impaktu ba sira nia saude.
Nia dehan, lixu neebe soe naklekar deit iha area merkadu Taibesi fo impaktu ba negosiante sira neebe hela iha rea merkadu nia saude.
“Ita haree foer neebe soe namkari iha area merkadu nee too dodok, iis no ular, fo impaktu boot ba ami iha nee. Halo ami atu han mos la diak,” hatete Negosiente merkadu Taibesi, Domingas Monteiro ba STL iha merkadu Taibesi Dili, Segunda (04/09/2023).
Nia dehan, konaba orariu parte saneamentu raut lixu hirak nee, semana ida dala rua deit, tanba nee negosiante sira mak raut rasik foer neebe dodok ona nee ba soe, tanba iis makaas halo sira han mos la diak.
“Senti ladun diak, tanba foer iha nee bainhira nakonu iis ona, ami rasik suru hodi ba soe, tanba nee ita husu ba governu tenki tau atensaun hodi haree servisu saneamentu nian,” nia tenik.
Iha fatin hanesan, negosiante seluk Antonio Gonçalves informa, sira mos preokupa ho sanitasaun baziku iha merkadu nee, hanesan hariis fatin. Tanba hariis fatin neebe iha la favorese.
“Hariis fatin ida agora nee ema barak mak uza hodi hariis no fase roupa. Balun odamatan laiha ona, tanba nee bainhira ema barak, tenki hein malu tanba odamatan laiha, depois balun soe lixu ba laran entaun iis ita haris mos dada iis la diak, tanba dois,” nia esplika.
Tuir observasaun STL nian iha terenu, lixu fatin iha merkadu Taibesi barak mak aat, tanba nee negosiante sira soe lixu mos anin huu naklekar iha fatin-fatin.
Aleinde nee, haris fatin nee negosiante sira utiliza selu, bainhira sira uza hodi hariis no fase ropa, sira selu 25 sentavus, fase roupa 50 sentavus.
(jen)
