Nesesidade Baziku Komesa Menus, Covalima Oan Husu Governu Distribuisaun Urjente

Ekipa Servisu Covalima Vitoria ho Domin-20 (EKSES-COVID-20) husu ba Ministeriu Koordenador Asuntu Ekonomia (MCAE-sigla Portugés), atu distribui urjentemente nesesidade baziku ba Covalima, liu liu ba komunidade postu administrativu Fatumea tanba aihan ba sira komesa menus ona. (Foto: STL/Alberto Menezes)

DILI, STLNEWS.co – Ekipa Servisu Covalima Vitoria ho Domin-20 (EKSES-COVID-20) husu ba Ministeriu Koordenador Asuntu Ekonomia (MCAE-sigla Portugés), atu distribui urjentemente nesesidade baziku ba Covalima, liu liu ba komunidade postu administrativu Fatumea tanba aihan ba sira komesa menus ona.

Bazeia ba rezolusaun governu No. 4/2021, 15 Fevereiru 2021, neebe impoen ona hodi implementa serka sanitariu (lockdown) iha munisipu rua, hanesan Covalima ho Bobonaro, nunee bandu totalmente movimentu tama no sai iha munisipiu rua refere.

Tuir portavoz Ekipa Servisu Covalima Vitoria ho Domin-20 (EKSES-COVID-20), Rosario Doloroso Ximenes, katak, hafoin governu hasai rezolusaun hodi implementa serka sanitaria iha munisipiu Suai, maibe komunidade postu administrativu Fatumea sira komesa ona hasoru difikuldade tanba nesesidade baziku ba sira hahu menus.

Mapa Fatumea (Foto: Espesial)

“Tanba nee ami Covalima oan sira neebe hela iha kapital Dili, neebe deside hodi hamahon aan iha Ekipa Servisu-Covalima Vitoria ho Domin-20 (EKSES-COVID-20), senti preokupa tebes ho situasaun atual iha postu administrativu Fatumea, tanba komunikasaun sira hahu enfrenta menus aihan, tanba laiha ona dalan atu asesu ba merkadu,” dehan portavoz Ekipa Servisu-Covalima Vitoria ho Domin-20, Rosario Doloroso Ximenes, iha Sede Renetil Palapasu, Sabadu,(27/02/2021).

Tanba nee portavoz Ekipa Servisu-Covalima Vitoria ho Domin-20 (EKSES-COVID-20) husu ba governu, liu liu Minesteriu Koordenador Asuntu Ekonomia atu tau atensaun ba preokupasaun komunidade postu administrativu Fatumea nia konaba menus aihan.

“Husu ba Ministeriu Koordenador Asuntu Ekonomia atu tau konsiderasaun hodi responde ba pedidu husi Autoridade Munisipiu Covalima, nunee bele urjentemente Conselho Consultivo Lokal (CCL) halo distribuisaun fos ba komunidade sira iha fatin afetadu Covid-19, liu liu Postu administrativu Fatumea,” tenik nia.

Nia mos dehan, ho rezolusaun governu implementa serka sanitaria iha Covalima, limita tebes atividade komunidade sira atu asesu ba saida deit.

Reportajen: Ekipa STL

LEAVE A REPLY

Please enter your comment!
Please enter your name here