DILI, STLNEWS.co – Sosiedade Sivil apoiu ideia diak husi Prezidente Republika Jose Ramos Horta neebe hatete, atu halo nomeasaun ba embaixador foun labele politiza, presiza mak iha matenek no kapasidade.
Lia hirak nee hatoo husi Diretor Ezekutivu Hak, Feliciano da Costa Aroujo ba STL iha nia knaar fatin Farol, Kinta (21/09/2023).
Nia hatete, estadu nee laos partidaria, laos partidu ida nee manan deit mak nia ema iha vontade atu servi ba estadu ida nee.
“Hau hanoin prezidente nia hanoin diak, signifika katak sidadaun hotu-hotu la haree ba nia kor husi partidu ida neebe, maibe ninia partisipasaun no komitmentu i ninia responsablidade liu-liu mak ida nee, tan ninia vontade atu didika nia aan hodi servi ba estadu,” katak nia.
Diretor HAK hatete, delega embaixador labele haree ba partidaria, maibe ema iha kapablidade atu bele promove ejistensia RDTL nee rasik nasaun liur, no ida seluk mak oinsa lobi investor sira mai investe iha rai laran.
“Kapablidade nee aas liu entre kapasidade ho skil nee nia aas liu, kapablidade nee laos nia iha deit kapasidade maibe nia iha situasaun hotu nia bele sai hanesan lideransa nia bele sai hanesan jestor neebe diak nia bele jere situasaun hotu,” katak nia.
Nia hatutan, labele delega tanba deit partidu politiko se ba tanba politiko sei serbi deit ba nia partidu laos intrese ba estadu RDTL nee tanba nee mak presiza tau atensaun ba ida nee.
Nunee mos Peskizador AJAR, Inocencio de Jesus Xavier hatutan, Nomeasaun Embaixador sira presiza ema iha esperiensia no kualifikasaun no siensia labele tanba partidu ema deit maibe sai diplomatiko tenki iha kapasidade diplomatiko, konhese ema nia kultura.
Inocencio hatete, sai embaixador presiza iha matenek no esperiensia ba serbisu bilateral tenke domina, labele tanba partidu mai haruka ba embaixador ba koalia saida kona-ba serbisu nee.
“Mesmo ke ita relasaun internasional ita seidauk halo knaar no pratika buat sira nee ita foin teoria deit mak mai lansun mos problema tanba nee mak tenke iha esperiensia, tanba nee hau hanoin PD ho FRETILIN nia ema laos sira husi partidu nee maibe tanba Timor oan no iha kapasidade tanba polítiku iha eleisaun deit agora liu ona, maibe agora nee presiza Timor oan mak servisu makaas atu lori rai nee ba oin,” katak nia.
(eme)
