Obriga Ministra Saude Husu Deskulpa

Foto: Espesial

DILI, STLNEWS.co – Akademista Universidade Nasional Timor Lorosae (UNTL), Camilo Ximenes Almeida, husu ba Primeiru Ministru atu obriga Ministra Saude (MS) Odete Maria Freitas Belo, hodi husu deskulpa ba nia aktu neebe mak hatudu ba sosiedade.

Nia hatete los duni, kuandu ita akompanha notisias hakfodak oituan ba atitude MS neebe ba vizita iha Suai fatin neebe ita konsidera risku, maibe ministra rasik la uza maskra no husi aspektu psikologia nia rasik, nunka hakfodak ba membrus seguransa sira neebe simu nia hotu-hotu uza maskra.

Camilo dehan, nee hatudu sinal katak, esforsu tomak neebe mak durante nee halo hodi bele populasaun fiar ba VIII Governu hodi luta kontra covid-19, maibe realidade hahalok membru ida ka rua bele hamonu imagen VIII governu nee rasik.

“Ita husu PM atu obriga Ministra Saude hodi husu deskulpa ba nia aktu neebe nia halo, hodi nunee bele hadia fali imagen VIII Governu nian iha sosiedade,” hatete Akademista UNTL Camilo Ximenes ba STL iha knaar fatin Caicoli, Kuarta (10/03/2021).

Akademista husu ba PM atu obriga MS hodi husu deskulpa ba nia aktu neebe hatudu iha publiku, tanba Ministra fo ezemplu la diak.

Nia mensajen ba governu atu labele fo ezemplu ba publiku ho aktu nee, tanba nee membru governu sira mak tenki fo ezemplu diak ba sosiedade.*

Reportajen: Blandina Mauno/Joaninha Belo
Editora: Carme Ximenes

LEAVE A REPLY

Please enter your comment!
Please enter your name here