Observasaun FONGTIL Nota Fiskais Balun Koko Vota Dala 2

DILI, STLNEWS.co – Diretor Ezekutivu FONGTIL, Valentin da Costa Pinto afirma, FONGTIL ho nia membru sira halo observasaun ba iha eleisaun parlamentar iha dia 21 Maiu 2023, haree husi aspetu situasaun lao hakmatek, maibe iha fatin balun sistema kontrolu ladun diak hodi hamosu fiskais balun koko atu vota dala rua, nee akontese iha Malilaet.

Diretor Valentin dehan, FONGTIL ho ninia membru sira nia observasaun ba eleisaun parlamentar tinan ida nee, enjeral haree husi aspetu situasaun kontinua hakmatek, laiha destornu konaba tempu neebe permiti ema ba iha sentru votasaun sira nee lao ho diak.

“Maibe ami mos haree iha fatin balu ladun diak ba sistema kontrolu nian, tanba nee halo ita nia sistema iha tendensia konaba praud, tanba ita iha fiskais balun neebe mak koko atu vota dala rua, nee akontese iha Malilaet nian neebe fiskais atu vota dala rua,” dehan nia ba STL liu husi telefone, Segunda (22/05/2023).

Valentin informa mos katak, iha pesoal balun neebe deskonfia laos sidadaun Timor oan polisia kaptura ona, iha parte balun neebe mak laos nasionalidade Timor oan, mais hetan kartaun eleitoral no vota, nee buat ruma neebe presiza apresia, mais nee ladiak ba ita ninia lalaok sira.

“Ami mos haree iha sistema konaba sentru votasaun sira, ita haree katak, iha fatin suku no aldeia sira no iha sentru votasaun hotu nee bele fasilita ema hotu-hotu bele vota ho diak,” tenik nia.

Nia afirma, maibe iha fatin balun iha Fatumeta hatudu iha alina naruk, tanba nee falha iha informasaun neebe mak hatete ba ema hotu-hotu, lo-loos sentru votasaun sira nee too ba ema hotu, i la presiza halo alina naruk hodi afeta ba bolitin de votus neebe mak la too.

Nia sublina, lo-loos nee tenki informa antes ema hotu-hotu hatene para fasilita ema idak-idak hodi bele ba iha sentru votasaun sira nee ho diak.

Nia hatutan, iha aspetu balu neebe mak FONGTIL kontinua haree katak, iha sentru votasaun sira fasilidade ka sentru votasaun sira neebe mak iha fatin balun, FONGTIL haree rasosinu ba maluk sira neebe ho defisiensia ain, defisiensia matan ba fasilidade sira nee kuaze laiha, neebe atu fasilita sira hodi ezerse sira nia votus.

Nia hatutan, nunee mos konaba tinta ninia kapasidade neebe mak fasil ema hamoos, nee mak fo afetasaun kuandu ema bele halo mak ema ida bele ba vota dala rua ka dala tolu.

“Tanba tinta nee ladun hatudu kualidade diak, ida nee hau hanoin buat ruma neebe mak hatudu lisaun diak, neebe sempre melhora diak ba iha futuru,” hakotu nia.

(dom)

LEAVE A REPLY

Please enter your comment!
Please enter your name here