Ofisial Polisia 48 Simu Graduasaun

Polisia Nasional Timor Leste (PNTL), realiza seremonia abertura Ano letivu Centru Formasaun Polisia (CFP) 2021, no gradusaun Diploma Jestaun Ezekutivu Polisia ba Graduadus hamutuk 48 husi Ofisial Polisia. (Foto: STL/Claudios de Jesus)

DILI, STLNEWS.co – Polisia Nasional Timor Leste (PNTL), realiza seremonia abertura Ano letivu Centru Formasaun Polisia (CFP) 2021, no gradusaun Diploma Jestaun Ezekutivu Polisia ba Graduadus hamutuk 48 husi Ofisial Polisia.

Liu husi diskursu, Komandante Centru Formasaun Polisia (CFP), Superintendenti Xefe Arquimino Ramos hatete, ohin loron 22 Janeiru marka tan istoria foun ida ba Polisia Nasional Timor Leste (PNTL).

“Tanba ohin ita bele asiste seremonia abertura ano letivu CFP 2021, neebe sai ona hanesan kultura ba eskola hotu-hotu inklui mos Centru Formasaun Polisia (CFP), no mos seremonia graduasaun ba Diploma Jestaun Ezekutivu ba dala uluk no mos kursu sira seluk” hatete nia iha Akademia Polisia Comoro, Sesta, (22/01/2021).

Nia hatutan, tuir planu abertura ba tinan Ida nee halo graduasaun mos ba kursu pedagojia, neebe akademia Polisia fornese ona ba korpo dosente sira husi Universidade da Pas (UNPAZ), maibe tanba iha situasaun Estadu Emerjensia (EE), labele organiza serimonia dala ida deit.

“Sei buka tempu mamuk hodi halo graduasaun ba kursu sira seluk, husi 11 kursu neebe mak ita organiza iha CFP,” dehan nia.

Komandante CFP nee esplika, atu hasae kunesementu Polisia, buat hotu presiza liu husi sistema no formasaun neebe diak, no relevante ho situasaun no kondisaun neebe Timor Leste iha.

Nia salenta katak, formasaun ba ofisial superior sira nee nudar mos formasaun prinsipal iha hodi forma kompetensia hodi servi, no proteze povu liu husi kunhesementu neebe maka iha no preparadu, teknik nia.

“Formando sira nee mai husi ofisial polisia sira neebe koloka ona iha Unidade no Munisipiu sira hotu, bain hira hahu kursu dira hamutuk 52, maibe sira neebe maka kompleta kursu hamutuk iha ema 48, no nain 4 maka labele hamutuk ona ho ita tamba maromak bolu uluk ona sira,” nia afirma.

Iha fatin hanesan mos Maknifiku Reitor UNPAZ, Adolmando Soares Amaral hatete, Kooperasaun entre Universidade da Paz ho Centru Formasaun Polisia (CFP), lao fulan hira ona, maibe seremonia ba graduasaun hanesan nee foin maka primeira vez.

“Graduasaun hanesan nee foin maka primeira vez akontese iha Timor, maibe iha nasaun sira seluk graduasaun ho modelu hanesan nee babain ona,” hatete Reitor UNPAZ nee.

Reportajen: Claudios de Jesus
Editora: Carme Ximenes

LEAVE A REPLY

Please enter your comment!
Please enter your name here