OJE Aprovadu, Governu Abandona Mate Isin Sidadaun

Deputada Bankada PD, Elvina Sousa. (Foto: Espesial)

DILI, STLNEWS.co – Laiha kareta funerariu tula mate isin, inan aman kous lao husi Gleno ba too Hatolia, Parlamentu Nasional (PN) konsidera governu hanesan abandona hela sidadaun, mezmu OJE aprova dala tolu, maibe labele jere ambulansia.

Lamentasaun nee hatoo husi Deputada Bankada PD Elvina Sousa hatete, iha akontesementu lubuk ida neebe akontese, atendimentu Carro funerario, komisaun F halo relatoriu husi tempu ba kona ba kareta funeraiu nee, maibe situasaun nee akontese fila -fila. Tanba sidadaun mate tula motor, tula angguna, no mos kous deit.

Tuir nia, semana kotuk, bebe feto ida fulan 9, mate iha Postu Saude Munisipiu Ermera, inan aman hein ambulansia kalan too dader, nunee hein tan too lokraik, ambulansia laiha, inan aman kous deit ho manta lao ain, husi Gleno ba too iha Hatolia.

“Orsamentu Jeral Estadu durante aprova nee ba iha neebe hotu. Hau koalia tanba, hau vota afavor ba OJE dala 3, i hau vota afavor tanba ho esperansa boot katak iha mudansa pozitivu ba povu nia moris, maibe hau triste tanba depois aprova OJE maibe Ministeriu Solidaridade Sosial lakonsege jere ambulansia. Familia hasoru situasaun tristeza boot, depois laiha ambulansia, ida nee familia atu triste ba oan mate, atu triste tanba laiha ambulansia, nee tanba estadu ka governu hanesan abandona hela sira,” preokupa Elvina iha PN Segunda (22/02/2021).

Nia esplika, iha Janeiru 2020 sidadaun ida mate iha Aileu, atu tula mate isin nee ba Bobonaro, maibe familia tula deit tula ho Angguna husi Aileu ba too Bobonaro, tanba laiha ambulansia. iha Outubru 2020, tekniku EDTL ida mateiha Baucau bainhira halo servisu manutensaun ba eletrisidade, infelizmente nia kolega sira tula ho motor. Nunee mos akontesementu semana kotuk, iha Ermera laiha ambulansia tula mate isin, inan aman kous deit husi Gleno ba too Hatulia.

Nia dehan, ambulansia deit jere labele, nia komprende katak desentraliza ba munisipiu sira mak jere, maibe prezidente munisipiu sira halo deit saida mak labele jere ambulansia atu tula mate isin sidadaun.

Hanesan reprezentante povu husu, atu labele akontese tan sidadaun ida kuandu mate laiha ambulansia, ida nee hanesan mos atensaun ida ba governu ita atu haree. Tuir loos nee labele akontese, há não ser que laiha OJE, maibe OJE aprovadu no alokadu nusa mak labele jere ambulansia funerariu. Governu tenke tau atensaun oinsa bele jere ambulansia, tanba saida mak nia sidadaun balu mate tenke tula ho motor, angguna no mos balu kous deit.

Tuir nia, laos akontesementu 3 nee deit, maibe sei iha tan akontesementu neebe seidauk asesu, tanba nee husu Governu nia atensaun maximu.

Nunee mos Deputada Bankada CNRT Maria Fernanda lay sekunda , mate isin tula ho motor, angguna no kous deit, ida nee mos atu hatete katak iha fulan, iha familia nain 2 neebe lori bebe mai trata iha Dili, bainhira mate, atu lori ba fali munisipiu COvalima maibe ambulansia laiha.

Nia informa, situasaun nee loos duni, balu mate familia mak tau fali mina ba ambulansia, serah que Governu laiha osan atu ense mina ba ambulansia.

Tuir Deputada Lay, iha buat ruma neebe lao laloos, ida nee laos duun maibe nee jestaun ladiak. Presiza iha jestaun diak, tanba nee husu ba Governu liu husi ministeriu solidaridade atu esplika tanba sa mak akontese nunee.

Hatan ba kestaun nee reprzentante Governu, atual Ministru Assuntu Parlamentar no Komunikasaun Sosial Francisco Jéronimo hatete, “Ami rezista preokupasaun deputadu sira nia liu-liu kona ba kareta funerariu, nee loos duni, ida nee situasaun ida neebe ita hotu laespera, maibe ida nee akontese iha Ermera, no fatin seluk tan.” nia dehan.

Membru ezekutivu nee esplika, hanesan ema hotu hatene katak, ida nee kompetensia administrador sira ho prezidente autoridade sira nian, daluruma iha failla balu tanba nee sira lakonsege rezolve problema sira nee.

Neebe tuir nia, sei koordena ho Ministeriu Estatal atu ba futuru labele akontese tan.*

Reportajen: Domingas Soares/Guilhermina Franco
Editora : Domingas Gomes

LEAVE A REPLY

Please enter your comment!
Please enter your name here