Oknum PNTL Tiru Joven Nain 3 Iha Caicoli

DILI, STLNEWS.co – Oknum Polisia Nasional Timor-Leste (PNTL) ida hakanek joven nain tolu (3) nia isin neebe tiru ho pistola mais ou menus ho distansia 5 metru, iha aldeia Zero 04, Suku Caicoli, Postu Administrativu Vera Cruz, Munisipiu Dili.

Vitima nain tolu nee ho identidade mak hanesan, Domingos Valdo dos Santos (20), tiru kona iha kabas karuk, Pauleta de Jesus Carlos (17), polisia tiru kona-ba iha kelen parte karuk, Ricardo Abrăo da Costa António (18), kanek iha ulun.

Vitima Domingos Valdo dos Santos (20) iha Segunda (03/05/2021) haktuir kronolojia katak, iha lorokraik mais ou menus tuku lima liu, mosu konfrontu asalta malu entre juventude bairru Maskarinas ho Kailoli. Durante konfrontu, joven sira husi bairru Maskarinas organiza malu ho sasan kroat hanesan katana no samurai hasoru sira iha Kaikoli.

Bainhira too iha postu polisia Maskarinas nia oin, oknum neebe halo hela seguransa, koko atu hakalma situasaun ho pistola tiru direta hasoru joven sira husi parte Kaikoli nian, hodi hakanek sira nain tolu.

“Ami hasoru sira tun mai ho armas brankas, kaer kolega atu hodi sae ba leten, entaun ami hasoru sira, polisia mos la tiru sira ida lori armas brankas nee, ami ida liman mamuk atu hadau kolega ida sira rasta sae ba nee, tiru fali ami. Nee mak kolega nee monu tun tiha, konsege ami uza fatuk hasoru sira hodi hadau fali kolega mai, nee mak konsege hetan tiru tan”, haktuir vitima Domingos iha nia rezidensia Caicoli, Segunda (02/05/2021).

Nia hatutan, akontesimentu nee mosu, bainhira nia koko atu salva hela nia kolega ida, ikus mai hetan tiru husi nia kotuk hodi rezulta kanek iha kabas karuk.

Olga de Jesus, inan husi vitima Pauleta de Jesus Carlos (17), nuudar sasin ba insidente nee haktuir, oknum nee se direta pistola hodi tiru hasoru nia oan sira ho distansia kuaze metru lima de’it.

Ho situasaun nee, parte familia vitima sira ezije justisa ba komandu PNTL atu prosesa nia membru tuir lei neebe vigora iha Timor-Leste.

“Ida nee violasaun ida ba direitu ema nian, tanba nia (oknum) mai tiru loos ami nia deit. Ida nee hanesan inan ami la konkorda. Ida tenke halo investigasaun ba nia duni. Ami hakarak husu justisa loos deit, tanba horkalan ami ba polisia, mais haruka ami fila, imi iha neebe nee, ema la book ona,” hateten nia.

Entretantu, komandante jeral PNTL, Komisariu Faustino da Costa dehan, dadaun nee ekipa Servisu Investigasaun Kriminal (SIK) prosesa hela oknum polisia nee, hafoin remata mak sei anunsia rezultadu ba publiku.

“Liga ho akontesimentu Maskarinas, oras nee ekipa investiga hela i tempu sira tuir mai nian sei hatoo husi portavoz komandu PNTL nian”, hateten Komandante Faustino iha Komjer Caicoli.

Husi vitima nain tolu nee, Pauleta de Jesus Carlos (17), hetan kanek grave tanba tiru kona-ba iha kelen parte karuk, no oras nee baixa hela iha HNGV, ho Ricardo Abrão da Costa António (18), kanek kaman, tanba kartus kose deit iha ulun.*

Reportajen: Claudios de Jesus
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Komunidade La Kumpre Serka Sanitaria

DILI, STLNEWS.co - Komunidade la kumpre regulamentu prevensaun Covid-19 iha tempu serka sanitaria (SS), tanba governu la kria kondisaun neebe diak ba sira. Program Officer...

Governu Implementa SS – KO, SIJK Kontinua Halibur Ema Barak

DILI, STLNEWS.co - Governu kontinua estende serka sanitaria (SS) no konfinamentu obrigatoriu (KO) hodi bandu atividade misa, eskola no festa, maibe Sentru Integradu Jestaun...

Covid-19 Aumenta, Aprendizajen Kontinua Paradu

DILI, STLNEWS.co - Edukasaun Munisipiu Viqueque ho saude, deside seidauk halao prosesu aprendizajen iha eskola, tanba numeru pozitivu Covid-19 aumenta. Tuir Diretor Edukasaun Munisipiu...
%d bloggers like this: