DILI, STLNEWS.co – Papa Francisco hatoo mensajen dame nomos bensaun ba sarani sira iha Timor Leste (TL), husu atu hili desizaun diak liu hotu, lori prosperidade i pas ba familia no nasaun.
Papa Francisco hatete, maun alin feto doben sira husi Timor Leste hasoru malu hela ho imi nia bispu sira, sira mesak matenek deit.
“Sira haktuir ona mai hau moris sarani sira nian iha imi leet, oinsa mak imi servisu, oinsa imi buka hakaas aan atu sai buras hanesan povu neebe forti, hau deseja diak ba imi hotu, bainhira hili atu halo desizaun ruma, hau hein katak imi hatene halo desizaun ida neebe diak liu hotu,” mensajen Papa Francisco nian publika iha media DCAD CET, Roma, neebé STL asesu, Sabadu nee (06/05/2023).
“Uluk nain hau hakarak pas ba imi, hakiak imi nia aan valores sira, valor humanu, valor familia nian, liu-liu moris iha ksolok laran,” dehan nia.
Papa Francisco hatete, ksolok nee efeitu ida husi Maromak nia grasa, atu Nai haraik ba imi grasa ksolok nian hodi lao ba oin nafatin, nunee keta lakon matak malirin ksolok fiar nian.
“Hau komprimenta imi ho nia bensaun, hau husu atu imi reza mai hau, hau fo bensaun ba imi ho fuan laran tomak, lao ba oin nafatin, hau bensaun ba imi hodi Aman, Oan no Espiritu Santu sira Nia naran amen. Nain Feto tau matan ba imi,” hakotu nia.
(joa)
