DILI, STLNEWS.co – Prezidente Parlamentu Nasional (PPN), Aniceto Longuinhos Guterres Lopes dehan, Parlamentu Nasional envia ona orsamentu retifikativu ba iha Prezidente Republika (PR) husi horiseik, depois plenaria aprova no Komisaun C trata kedas iha redasaun final.
Tuir PPN, Aniceto Longuinhos Guterres Lopes hatete, orsamentu retifikativu haruka tiha ona husi horseik, plenaria, parlamentu aprova depois komisaun C halao sira nia knaar halo redasaun final.
“Entaun Komisaun C trata hotu tiha i envia kedas ba iha Prezidente Republika (PR), no ita hein wainhira Prezidente Republika atu promulga iha tempu badak,” informa PPN ba jornalista sira iha Parlamentu Nasional, Kinta nee (12/05/2022).
Antes nee, deputadu sira iha Parlamentu Nasional aprova ona proposta orsamentu retifikativu ho montante billaun US$ 1 resin, ho votus afavor 36, kontra 22, abstensaun 5.
Entretantu, tuir dadus neebe mak STL asesu orsamentu retifikativu neebe mak governu submete ba iha parlamentu ho montante billiaun US$ 1,1 no orsamentu nee sei uza hodi finansia medidas komplementar hamutuk 13, ho nia detalha hanesan tuir mai nee, kriasaun fundu veteranus ho orsamentu alokadu billiaun US$ 1; II) Atribuisaun pagamentu desimu terseiru US$ 200 ba kada família (exeptu funsionariu publiku sira) ho orsamentu alokadu millaun US$ 70; III) Uma kbiit laek plus ho orsamentu alokadu millaun US$ 25; IV) Bolsa Estudu ba mellór graduadu estudante ensinu báziku no sekundariu ho orsamentu alokadu millaun US$ 7,5; V) Programa mão de obra ba postu administrativu, millaun US$ 7,2; VI) Revitaliza kafe no subsidiu ba kafe Laku-teen ho orsamentu alokadu millaun US$ 6,4; VII) Pagamentu ba diferensa remunerasaun PNTL nian ho rejime salarial foun, ba membru PNTL 4.096 ho orsamentu alokadu millaun US$ 5,1; VIII) Harii sede arte marsial no rituál millaun $2,5; IX) Programa Eskola iha uma ho orsamentu alokadu millaun US$ 2,1; X) Internet gratuita iha eskola sira, millaun US$ 1,1; XI) Subsídiu akomodasaun ba PNTL no F-FDTL ho orsamentu alokadu millaun US$ 1,9; XII) Estabelesimentu sekretaria ba asuntu traballador esterior no komunidade timoroan iha diáspora US$ 500 mil; XIII) Empregu ba mellór alunu universitariu sira US$ 437,5 mil.
(dom/gui)
