DILI, STLNEWS.co – Partidu politiku (Parpol) sira neebe hetan vitoria iha eleisaun parlamentar tinan nee, tenki halo dezenvolvimentu ba rai ida nee.
Kesataun nee hatoo husi Xefi Suku Kolmera Armenio Aleixo da Silva ba STL iha nia knaar fatin Kolmera, Dili, Tersa nee (02/05/2023).
Nia husu ba partidu politiku neebe hetan vitoria iha eleisaun parlamentar tinan nee, tenki halo dezenvolvimentu ba nasaun ida nee.
“Ita ukun aan tinan 20 ona, ita nia dezenbolvimentu hakdasak inklui ekonomia, povu nafatin hakilar bee moos, estrada, eletrisidade no kampu de trabalhu, neebe hanoin nee katak governu ida neebe ukun tenki hanoin hodi dezenvolve rai ida nee” tenik nia.
Nia hatete, dezenvolvimentu durante nee lao, maibe balu neebe mak tinan 10 halo hela nee mos kontinuasaun too hela agora sei kotu kotu hela.
Nia akrsenta, ekonomia tun makaas, depois foin lalais governu hasae tan taxa, ema sira kbiit laek sosa labele.
Aleinde nee, nia mos husu ba komunidade sira atu partisipa masimu iha eleisaun ida nee, atu nunee sidadaun ezerse idak-idak nia direitu de votu ba partidu neebe nia tau konfiansa hodi ba kaer ukun halo dezenbolvimentu ba rai ida nee, hodi hadia povu nia moris.
Nia mos husu ba sidadaun sira atu vota ho diak, tanba hili sala sei lori sofrementu tinan lima.
“Ida nee mak hau nia apela ba komunidade sira tenki vota ho didiak no konsiensia,” hakotu nia.
Nunee mos komunidade Aniceto Alves mos husu partidu politiku sira atu labele insulta malu beibeik, maibe oinsa atu hatoo programa ba povu, atu liberta tiha povu ida nee husi sofrementu sira.
“Ami hanesan sidadaun neebe mak atu ezerse ami nia direitu ba partidu politiku sira, ami husu para atu valoriza ami nia votu sira liu husi politika, atu oinsa para lori ami povu ida nee moris ho dignu iha rai ida nee” katak nia.
Entretantu, Juventude Jaquel do Carmo mos husu lider sira tenki hatoo sira nia programa, labele insulta malu beibeik.
“Ami joven prersiza imi nia programa sa politika mak imi lori koalia mai ami, hatudu programa ida neebe bazeia ba ita nia planu estratejia, nunee ami bele hatene no hili ita boot sira,” tenik nia.
(mar)
