DILI, STLNEWS.co – Partisipasaun feto iha politika no ekonomia hatudu duni progresu diak, tanba feto barak hola pozisaun iha governu, Parlamentu Nasional, inklui iha vida emprezarial.
“Hanesan feto potensial ita tenki orgulhu ba ita nia feto maluk sira neebe hola pozisaun iha fatin importante sira, feto iha kapasidade atu lidera iha governu, lidera iha PN nomos iha setor ekonomia. Feto barak haknaar aan hanesan emprezaria neebe susesu tebes, hodi investe iha rai laran, hanesan bis neebe halo operasaun Dili Kupang, feto sira mak investe, ida nee hatudu ezemplu diak ba feto TL,” kestaun nee fo sai husi feto emprezarial i hanesan mos Koordenador Feto Potensial, Eugenia Goncalves ba STL, Domingo nee (02/04/2023) liu husi telefone.
Nia katak, governu fo fatin ba setor privadu hodi involve feto maluk sira, oinsa feto bele sai nain ba kompanhia ida, no invete iha setor ida, maski tenki jere husi uma laran too iha nia kompanhia, maibe nee hanesan pasu ida ba feto sira atu hola parte, hanesan mos mane sira oinsa sai feto politika neebe intelektual iha vida politika nomos vida emprezarial nee rasik.
Iha parte seluk, Deputada Elvina Sousa hatutan, partisipasaun feto iha vida politika no ekonomia aas tebes, tanba lei fo dalan ba feto sira atu partisipa ativu, maibe feto balun sei kunfuzaun atu tama iha setor sira nee, no susar halo transformasaun, tanba partisipasaun feto iha pozisaun hanesan Prezidente, Autoridade Munisipiu, Autoridade lokal hanesan Xefi Suku no Xefi Aldeia nee sei menus.
Maibe haree iha setor emprezaria hatudu progresu.
“Hafoin eleisaun parlamentar hotu, ita sei hakatak ba eleisaun suku, tanba nee husu ba feto maluk sira atu kompete ho mane sira, maibe ita orgulhu tanba feto barak hola pozisaun iha parlamentu, governu, instituisaun relevante sira, nomos iha setor emprezarial, ida nee hatudu katak feto mos bele, no la depende ba mane sira,” dehan nia.
Nunee mos Deputada Lidia Norberta hatutan, feto barak mak hola parte iha vida politika nomos negosiu.
“Ita haree iha governu feto barak mak halao knaar iha neeba, iha parlamentu feto barak hola pozisaun hanesan deputada, iha vida emprezaria, feto barak mak susesu iha neeba, no iha autoridade lokal mak sei menus, nee ita sura deit ho liman, maibe ita nia Prezidente Autoridade Munisipiu Dili feto, nomos Xefi Aleia ida ka rua lidera husi feto,” dehan Prezidente Mulher Parlamentar nee.
(mad)
