Pasajeirus Hein Ro Iha Udan Laran

Pasajeirus neebe atu halo viajen husi Dili ba Oecusse ho ro Success, tenke hein iha udan laran, tanba seidauk iha terminal ka fatin neebe diak ba sira. (Foto: STL/Madalena Horta)

DILI, STLNEWS.co – Pasajeirus neebe atu halo viajen husi Dili ba Oecusse ho ro Success, tenke hein iha udan laran, tanba seidauk iha terminal ka fatin neebe diak ba sira.

Martinha Correia hanesan pasajeirus dehan, too agora seidauk iha terminal neebe diak ba pasajeirus sira, ho ida nee bainhira udan defikulta tebes ba sira, tanba ro nee depende ba oras, bainhira oras too mak foin loke portaun boot. Tanba bainhira portaun seidauk loke pasajeirus sira tenke hein hotu iha liur.

“Ami pasiensia deit ona, maski udan boot no loron manas ami hein nafatin, para hodi hein ema loke portaun nee, agora ita lori tan ho labaril kiik sira, susar tebes maski ohin ita hein iha loron neebe kona ita manas tebes, agora udan mak mai kona tan ita, maibe ita tenke pasiensia hein deit ona,” dehan Martinha ba STL, iha Ponte Kais, Dili, Tersa (22/12/2020).

Nia dehan, ro rua hanesan Berlin Nakroma ho ro Success nee para fatin mak iha kraik nee ba, maibe hanesan deit tanba hein roo nee iha loron manas laran nafatin, tanba seidauk iha terminal propriu ida ba pasajeirus sira, hanesan iha ponte kais Oecusse nian nee iha terminal ba pasajeirus sira, agora iha Dili mak seidauk iha terminal too agora.

“Agora udan tan tuir lolos sira haruka ita tama sae uluk ro, maski oras seidauk too atu loke portaun mos, udan nunee sira haruka ita tama uluk, tanba ema balun idade ferik katuas no balun oan nurak lori tan labarik kiik barak sira la hanoin ida nee, tanba ita mos sosa tiket mak sae ro ida nee, maibe atu sae mos ita terus tebes,” katak nia.

Iha parte seluk, Prezidente APORTIL, Flavio Cardoso Neves dehan, los duni katak, iha ponte kais Dili seidauk iha terminal ba passjeirus husi Dili ba Oecusse no Atauro, tanba pasajeirus sira hein ro balun hamriik iha aihun no balun tur, maibe terminal ba pasajeirus mak seidauk iha.*

Reportajen: Jacinta Sequeira
Editora: Carme Ximenes

LEAVE A REPLY

Please enter your comment!
Please enter your name here