DILI,STLNEWS.co – Diresaun Nasional Rejistu Notariadu (DNRN) fulan rua resin ona atendimentu pasaporte komum ba sidadaun sira laiha, tanba ne’e difikulta ba Timor oan nain 30 labele ba servisu iha Australia, tanba pasaporte laiha.
Kestaun nee hatoo husi Diretor Jeral Sekretariu Estadu Formasaun Profisional no Empregu (SEFOPE), Paulo Alves ba STL iha edifisiu Tradelnvest Dili, Kinta nee (04/05/2023).
“Ita agora daudaun enfrenta hela pasaporte, tanba ne’e foin daudaun ema 30 lakon deit nian servisu, tanba deit pasaporte laiha. Tuir lo-loos ne’e ba ona Australia, ba servisu ona, maibe pasaporte laiha, entaun nain 30 labele ba Australia,” nia hatete.
Nia esplika, trabalhador nain 30 ne’ebe atu ba servisu iha Australia nee trabalhador foun, maibe pasaporte laiha, entaun labele ba servisu.
Nia informa, foin daudaun ne’e SEFOPE halao enkotru ho Embaixador Australia nian iha Australia, koalia konaba pasaporte neebe mate ona bele tau deit cap atu nune’e sira bele mai halao servisu.
“Hau rekomenda ona ba Embaixador Australia nian, bele ga lae, pasaporte sira ne’ebe mate ona bele tau cap, maibe Australia lokohi ida, sira hakarak pasaporte foun, entaun ita husu tulu para pasaporte foun ne’e iha lalais, atu nune’e fasilita Timor oan sira, sei lae ezemplu mak sira nain 30 mak labele ba, tanba deit pasaporte laiha,” nia informa.
Nia hatutan, trabalhador neebe ba ona Australia depois fila-fali mos labele ba, tanba pasaporte mate ona, atu uza deit cap ba mos Embaixador Autralia nian la simu.
Iha fatin ketak, Carlita dos Santos nudar estudante neebe atu trata pasaporte komum dehan, fulan rua resin ona notariadu la halo atendimentu ba sidadaun sira neebe mak atu halo pasaporte komum.
“Hau hanesan estudante hakarak atu trata lalais pasaporte para bele kontinua nia estudu iha rai liur hanesan Indonezia, maibe situasaun nee hanesan impedimentu boot ida ba hau,” nia informa.
Nia hatutan, hanesan estudante nia senti tristi, tanba situasaun nee impede nia prosesu atu ba eskola iha rai liur, tanba nee husu ba governu atu toma atensaun ba falhansu sira nee, para nune’e iha futuru mai labele akontese tan.
Iha fatin hanesan, funsionariu DNRN fontes konfirmadu rekonhese, los duni too agora notariadu la halo atendimentu ba pasaporte komum, tanba kaderneta laiha, ne’e notariadu so halo deit pasaporte servisu no diplomatiku nian.
“Ita hein deit bainhira mak pasaporte foun iha para fasilita ita nian Timor oan sira nee ba rai liu, hanesan ba UK no Autralia inklui Koreia,” nia afirma.
(jen)
