DILI, STLNEWS.co – Paskua katak, sobu buat neebe nakukun no naroman nabilan halakon ona nakukun.
Padre Richardo Pasang, SVD hatoo liu husi nia omilia Sabadu nee (08/04/2023) katak, Sabadu aleluia hatete, Nia laiha ona iha nee keta tauk, Hau iha Galileia. EVANGELHO MATEUS 28 : 1 – 10.
“Paskoa katak sobu buat neebe taka metin iha ita ema nia moris. Odamatan rate sobu ona! Naroman nabilan halakon ona nakukun Soldadu neebe hein hela, tauk no nakdedar tanba kbiit husi lalehan. Nia la iha ona! Nia Moris Hias ona, Maromak nia prezensa la bele isola iha ita ema nia plano. Nakukun nia kbiit lakon ona. Paskoa mak prolamasaun hodi muda ita nia fokus, muda ita nia atensaun ba area seluk. Ita nia fokus ou atensaun laos deit ba rate maibe husu ita eskolante sira, ita ema fiar nain lao ba Galileia! Iha Galileia, ita ema nia moris fatin. Iha Galileia ema simples bele hasoru Jesus nebe moris hias,” dehan Padre.
Padre haktuir tan, muda ema nia atensaun ba Galiliea signifikadu katak sobu/halakon ema nia aura nakonu ho tauk, triste no desesperansa. Buat hotu tenke muda tanba Nai Moris Hias ona! Atu eskolante sira, atu ema hotu bele hetan ksolok, alegria.
“Paskoa mak Naroman – Nabilan – Esperansa Husi Paskoa Kristu, ita hotu tenke pronto atu passing over – muda – troka Ita tenke muda husi area rate neebe nakonu ho iis mate nian neebe halo ita dada iis la bele, ita tenke muda husi fatin neebe nakonu ho ‘polusi mate nian, Kuando ita nia hamutuk hodi koalia relasaun ho mate, destruisaun hodi sobu ita nia maluk sira no mos hakarak aat atu harahun ema nia esperansa,” katak nia.
Bibi atan kreda katolika nee hatutan, agora Kristu moris hias ona ema tenke simu espiritu no orientasaun ba Galileia foun. Iha Galileia foun, ema bele hetan naroman hodi renova nia moris.
“Ita hetan transformasaun totalmente wainhira ita hasoru Nai Jesus Kristu neebe moris hias. Orientasun ba Galileia mak espiritu Paskoa neebe halakon aroma rate ho esperansa katak iha ita nia uma ida-idak, fatin ita hela hamutuk, moris nuudar familia no maun alin, hatais Galileia foun neebe nakonu ho esperansa no mos sinal moris iha Kristu nia moris hias neebe liberta no salva ita. Mai ita hotu sai naroman ‘lilin-lilin kiik iha Naroman Kristu nian hodi fo naroman ba ita nia moris, familia no maluk sira seluk,” haktuir padre.
(eme)
