PATIFOR Lamenta DNSRN

Partidu Timor Forte (PATIFOR) lamenta ho Ministeriu Justisa no Diresaun Nasional Servisu Rejistu Notariadu (DNSRN) ba prosesu triagem iha fulan tolu nia laran. (Foto: Espesial)

DILI, STLNEWS.co – Partidu Timor Forte (PATIFOR) lamenta ho Ministeriu Justisa no Diresaun Nasional Servisu Rejistu Notariadu (DNSRN) ba prosesu triagem iha fulan tolu nia laran.

Kestaun nee hatoo husi Prezidente Interinu PATIFOR, Gregório Saldanha (Mouris) liu husi konferensia imprensa neebe mak halao iha sede PATIFOR, Farol,Tersa (02/02/2021).

“PATIFOR lamenta ho Ministeriu Justisa no Diresaun Nasional Servisu Rejistu Notariadu tanba durante triagem iha fulan 3 (tolu) nia laran, la notifika PATIFOR hodi hadia kedas sala neebe iha. Infelizmente, ikus mai tribunal de recurso maka tenki halao fali knaar ida nee hodi deteta falta sira.” hatete nia.

Prezidente Interinu husu Ministeriu Justisa no Diresaun Nasional Servisu Rejistu Notariadu atu serbisu seriedade no imparsialidade.

“Ami husu ba Ministeiru Justisa no Diresaun Nasional Servisu Rejistu Notariadu atu servisu ho seriadade, responsabilidade, imparsilidade profesionalismu, no transparasia hodi nunee la bele prejudika sidadaun sira nia direitu siviku, hadia povu nia moris iha rai timor-leste neebe ita hotu hadomi.” katak nia.

Presidente Interinu PATIFOR nee informa, husu ba kuadrus militantes no simpatizantes PATIFOR nia iha rai laran ka rai liur atu mantein kalma no neon metin hodi fo apoiu nafatin estrutura interinu PATIFOR, hodi hadia dokumentus sira neebe sei kurang atu nunee bele submete fali ba prosesu foun iha tempu badak.

Partidu sei fo orientasaun ba kordenador regional sira no sira sei hatutan ba koordenador munisipal no delegadus sira hodi halao servisu ida nee.

“Ikus liu hau hakarak husu ba kordenador regional, koordenador munisipal nomos delegadu sira, hamutuk ho militantes, simpatizantes no apoiantes PATIFOR sira atu hametin unidade, forte nafatin, pasensia nafatin, servisu makas nafatin hodi lao tuir deit lei sira neebe vigora iha Timor-Leste.

Nunee ita bele alkansa objetivu hodi harii PATIFOR nuudar partidu politika legal, hodi bele hatutan povu Timor-Leste nia mehi boot ba moris diak, moris ho digno, moris iha justisa social no moris ho oportunidade hanesan no PATIFOR, povu moris diak, nasaun forte,” hakotu nia.*

Reportajen: EST/JO
Editor: Crisogono Magalhães

LEAVE A REPLY

Please enter your comment!
Please enter your name here