Patrocino: Atauro Sai Munisipiu Laiha Problema

Foto: Dok STL

DILI, STLNEWS.co – Tuir Vice Deputadu Bankada CNRT, Patrocino Fernandes hatete, atu transforma Atauro sai ba munisipiu nee laiha problema, maibe tetu ba kapasidde finanseiru ho rekursu umanu bele ona ka seidauk. Nia dehan, iha konstuituisaun RDTL rasik hatete Atauro nee autonomu espesial neebe laiha problema.

“Problema maka entermus ba rekursu hotu-hotu, hanesan rekursu umanus ho rekursu materias nee bele ona ka seidauk. Atu transforma Atauro ba munisipiu, maibe enprinsipiu hau hanoin laiha problema,” dehan nia ba jornalista sira iha PN, Tersa (23/02/2021).

Nia dehan, tanba governu maka iha kompetensia atu define, agora haree bainhira maka atu trasforma Atauro ba munisipiu ninia entrada envigor bainhira.

Nia afirma, konserteza bele, tanba iha ona OJE neebe aprova liu tiha ona agora lao prosesu ezekusaun, kuandu introdus ona Atauro tama ba munisipiu entermus kustu finanseru iha implikasaun.

“Relasiona numeiru populasaun hau seidauk haree lei ruma atu hatete dehan, munisipiu ida tenke ho populasaun hira, konserteza governu halo ona ninia estudu haree husi parte sira nee hotu. Hau nia haree importante liu-liu governu tetu atu haree katak, ita nia aspetus rekursu ho sira seluk bele ona ka lae,” tenik nia.

Tanba trata deit munisipiu 13 agora ulun faatuk moras ona, agora aumenta munisipiu sai barak tan nee oinsa, no buat sira nee hotu implika ba rekursu finanseiru. Konserteza Atauro mos populasaun ida neebe iha diretu atu goja hanesan munisipiu ida.

Maibe governu tenke atu haree trata estadu nee tomak, labele tanba ita hanoin katak sira nee parte ida atu promove ita nia governasaun iha publiku depois too ikus buat sira nee ladun funsiona tanba implika ba orsamentu.

Nunee mos postu sira neebe atu aumenta hanesan Hatolia, neebe atu sai ba Hatolia A ho Hatolia B, planu sira neebe komesa kedas husi governu sira liu ba kotuk, parese haree husi area geografia mos husi area porturbasaun.

“Maibe hau hakarak atu sublina katak, bainhira ita atu aumenta estrutura administrasaun nian atu sai boot ninia kustu finanseru boot, i ezije mos ita nia preparsaun ba rekursu entermus rekursu umanu no buat sira nee hotu sai hanesan baze ida presiza governu haree depois maka foti desijaun sira nee,” hatutan nia.

Nia akresenta, nee laos opsaun politika ida, hodi presiza ida atu apoiu ka la apoiu.

“Hau hanoin baze fundamental maka, tetu ba ita nia kapasidade finanseiru no tetu ba ita nia rekursu umanu. Tanba durante tinan hira nia laran ita trata postu administrativu 65 ho munispiu 13 ho rejiaun autonomu ida ulun moras teb-tebes.

Nia hatutan, kuandu aumenta munisipiu ida nee, ita aumenta tan problema ida, no aumenta postu administrativu mos aument tan problema ida.

Entaun ida nee ejije governu nia seriedade no laos seriedade deit, maibe ejije mos governu nia kapasidade iha setores hotu-hotu para bele fo andamentu fo segimentus ba politika sira neebe sira halo atu labele sai fali numera.*

Reportajen: Domingas Soares/Guilhermina Franco
Editora: Domingas Gomes

LEAVE A REPLY

Please enter your comment!
Please enter your name here