DILI, STLNEWS.co – Provedoria Direitu Humanu no Justisa (PDHJ) preokupa ho situasaun neebe akontese iha Baukau, idozu ida neebe atu trata nia dokumentus ikus mai lakon vida.
Situasaun ida nee akontese iha Baukau, Inan Justisa Dos Reis, idade 68, husi aldeia Caranunu, Suku Abafala, Postu Administrativu Kelikai, neebe iha loron Segunda, iha oras tuku 10 resin, lakon nia vida, tanba deit atu hetan dokumentus sertidaun nasimentu uza ba simu osan terseira idade, maibe la konsege, tanba oin nakukun monu iha resintu edifisiu konservatoriu, maibe ikus mai la konsege salva vida.
Tuir Provedor PDHJ, Virgilio da Silva Guterres katak, konaba asuntu ida nee sira iha konhesimentu, tristi, bainhira rona sidadaun ida mate, hein servisu publiku husi estadu nian.
“Lamenta ho situasaun ida nee, ami eziji ba entidade sira atu iha servisu publiku tau prioridade ba iha ema idozu, defisiensia, atu sira labele hein kleur, no sira neebe idade ona bele reprezenta husi familia,” dehan provedor ba jornalista sira iha Kaikoli, Kinta (10/08/2023).
Nia hatutan, orienta ona diresaun relevante fiskalizasaun atu buka hatene pormenores, motivu husi mate nee. Dala ruma idozu ona iha moras hanesan ema neebe idade ona, tanba nee iha atendimentu tenki haree ema neebe idade ona tau prioridade ba sira.
Virgilio dehan, sidadaun nee mate bainhira atu ba rata nia dokumentus ruma, tanba nee tenki haree fali ba iha maneira atende, medida neebe iha fatin apropriadu ka lae, servisu atende lalais ka lae, keta husik ema hein kleur, tanba nee tenki buka hatene.
Nia reforsa, laos mate iha uma, maibe mate iha fatin atendimentu, tanba nee presiza haree fali ba iha prosedimentu estadu halo atu fo atendimentu ba publiku agora sai kestaun, tanba mate iha fatin servisu nian. No agora fokus ba iha estadu, governu no entidade publiku sira nia maneira atende publiku sira, avita atu ba oin labele akontese tan.
(ter)
