DILI, STLNEWS.co – Relasiona ho Sekretariu Jeral Partidu FRETILIN, Mari Alkatiri, neebe hakarek karta ba lider karismatiku Kay Rala Xanana Gusmao hodi husu lider sira tuur hamutuk, Padre Domingos Maubere hatete nee tarde ona, tanba dadaun nee preparadu tama ba eleisaun.
Padre Domingos Maubere katak, hela deit oras tama ba eleisaun, nunee hotu-hotu preparadu ona, no povu maka hili no deside.
“Oras nee ita tama ona iha eleisaun, nunee povu maka preparadu ona, no povu maka hili, dialogu antes preparasaun agora aban atu eleisaun maka hanoin dialogu,” dehan Pe. Domingos Maubere ba jornalista bainhira halao konferensia imprensa iha Sede JPIG, Balide, Dili, Segunda (18/04/2022).
Padre nee dehan, bainhira atu halo dialogu nee antes, maibe dadaun nee tarde ona.
“Agora nee povu maka halo justisa, husi povu nia votus maka hatudu buat nee nia hakarak,” dehan nia.
Iha fatin ketak, Jurista Timor oan Padre Julio Crispin haktuir, depois de eleisaun prezidensial liu tiha maka lider sira bele halo dialogu, agora atu halo konaba saida, sira nia materia dialogu maka sira koalia hotu ona iha kampanha.
“Entaun bolu malu para husu deskulpa deit ona , sira atu halo tan dialogu hodi koalia saida tan, materia saida maka sira atu lori ba dialogu, tanba dialogu nee tenki iha materia,” tenik nia.
Tuir Jurista Timor oan nee katak, bainhira atu koalia tan konaba problema neebe liu ona, ida nee lori tan ba dialogu sei la rezolve buat ida, aumenta tan problema maka iha.
“Tanba sira neebe ukun tempu naruk mos bele halo buat ruma, balun mos labele halo, iha balun neebe ukun tempu badak mos bele halo balun iha balun la halo neebe hanesan deit, iha balun halo diak iha balun halo aat liu fali, entaun tau ba dasi nee hanesan deit, laiha iha maka nia ukun nee halo buat hotu ho perfeitu,” dehan nia.
Ho nunee, nia hanoin dialogu ida nee ba materia foun atu halo buat seluk bele, maibe dialogu ba buat neebe sira halo nee hanesan deit.
(san)