DILI, STLNEWS.co – Partidu Frente Revolusionariu Timor Leste Independensia (FRETILIN) konsidera Planu Estratejiku Dezenvolvimentu Nasional (PEDN) seidauk atinje, tanba oras nee povu sei hakilar hela ba bee moos no seluk tan.
Kestaun nee hato’o husi Prezidente Bankada FRETILIN Francisco Miranda Branco ba jornalista iha Komite Sentral FRETILIN (CCF – sigla portugues), Sabadu nee (04/09/202)
Nia dehan, haree ba planu estratejiku sira nee seidauk atinje mak presiza halo revizaun.
“Ita haree iha agrikultura laiha avansu, setor bee moos saneamentu kuaze avansu, setor edukasaun oinsa entau presiza halo revizaun ba ita nia Planu Estratejiku Dezenvolvimentu Nasional hodi atualiza fila fali, tanba ita hakat dook tiha ona,” katak nia.
Nia hatutan, sekuandu bainhira ema tama iha natar no toos mak governu mos presiza kria garantia, povu kuda governu tenke garante merkadu ba sira nia produsaun neebe mak garantidu.
Nunee mos Konsellu Fundador Rede Observasaun Eleisoens Timor Leste (RONETIL) Lauretinho Alves dehan, governu presiza haree PEDN nee ho didiak, tanba ohin loron povu barak sei hakilar hela ba bee moos estrada no seluk tan.
“Governu presiza tau matan no kumpre promesa sira, tanba realidade povu sira barak sei hakilar ba bee moos, estrada mos aat, eskola balun aat no seluk tan,” dehan nia.*
Reportajen: Emerenciana Pinto
Editor: Ekipa STL
