DILI, STLNEWS.co – Husi omilia Amu Matias de Jesus Pinto, SDB katak, sarani neebe hatene perdua ba nia maluk sira, maski halo aat ba nia, nia mos hola parte iha Nai Maromak nia fuan, karik laiha perdua nee hola parte iha ema jintiu.
Bibi atan nee dehan, ohin Maromak konvida sarani sira hotu atu sai Maromak nia oan, entaun sarani sira mos tenki sai hanesan Maromak no halo tuir Maromak, se la hatuir mak laos Maromak, mak hanesan ema jintiu.
“Ita bainhira hirus ba objetivu neebe diak nee la sala, maibe hirus tanba odiu nee mak sala, tanba laiha perdua ba nia maluk sira. Ita halo sala nee frakeja ema ninian, maibe bainhira ita perdua maluk sira neebe halo aat ka halo sala ba ita, nee hola parte iha Maromak nia fuan,” dehan Bibi Atan nee liu husi nia omilia iha Igreja Parokia Maria Auxiliadora, Komoro, Domingu (17/09/2023).
Hatete bibia atan nee, leitura ohin konvida sarani sira hotu atu perdua maluk sira, nunee Nai Maromak mos bele perdua, maski maluk sira halo aat no halo sala ba o, bele hirus tanba halo aat ba hasoru o, maibe labele rai odiu, tanba Maromak hanorin nia sarani sira atu nafatin perdua.
Bibi atan nee afirma, inan aman bainhira hirus oan sira tanba hakarak muda oan sira nia atetude atu sai diak, nee inan aman sira la sala. Se inan ama la hirus oan sira husik deit bainhira oan nia hahalok ladiak ka laiha disiplina, nee inan aman sira mak sala, tanba lakon sira nia responsabilidade ba oan sira.
Bainhira Jesus ba haree ema faan sasan iha uma orasaun nian, Jesus hirus no nia duni sai ema sira nee hotu, tanba Jesus hirus hakarak koriji atetudi sira nee ba diak ninian.
Nia haktuir, entaun hirus neebe rai hirus ka odiu ida nee mak sala, maibe hirus ida halo koreksaun ba hahalok ruma no la rai hirus iha laran nee la sala, tanba hakarak hadia.
“Maibe rai hirus ka rai odiu nafatin iha laran ida nee sala boot no sala neebe Maromak bandu, tanba ida nee laos hahalok neebe maromak nia oan nian, mais nee hahalok ema jentiu nian,” sublina nia.
Kha novu testamentu Jesus nia ezemplu dehan fo nafatin perdua maske ema nee naok ten, no halo sala neebe ema dehan atu tuda mate maibe, Jesus nafatin fo perdua, maske perdua nee la fasil.
Nia tenik, maibe bainhira fo perdua mak hola parte iha Maromak no tau fuan Maromak nian, se laiha perdua nee tau fuan ema jentiu nian neebe la konese maromak, tanba Maromak nee domin nain, Jesus dehan fo uluk perdua ba o nia maluk sira, atu nunee Maromak sei perdua o nia sala.
(dom)
