Periodu Lockdown, Produtu Importasaun Tenke Kontinua

Reitor Universidade Da Paz, Adolmando Soares Amaral. (Foto: STL)

DILI, STLNEWS.co – Akademista husu governu bele halo lockdown ba munisipiu neebe iha lina entrada, atu bele taka movimentasun tama sai, maibe tenki kontinua simu produtu importasaun atu bele sustenta nafatin populasun sira iha periodu lockdown.

Kestaun nee hatoo husi Reitor Universidade da Paz, Adolmando Soares Amaral katak, estadu emerjensia nee tenki rigorozu iha lina entrada sira. Taka ba ema sira neebe tama sai, maibe ba sasan ka produtu importasaun sira tenki kontinua tama.

“Iha Timor Leste depende los ba produtu importasaun, tanba nee wainhira ita halo lockdown taka deit ba movimentasaun ba iha munisipiu, maibe produtu importasaun kontinua mai,” dehan nia ba STL iha nia knaar fatin UNPAZ, Kinta (04/03/2021).

Nia dehan, se bainhira governu sira ladefini didiak, maka depois produtu importasaun lamai maka munisipiu neebe iha hela lockdown sira sei infrenta problema hamlaha.

“Hanesan agora dadaun iha Munisipiu Covalima sira komesa halerik ona ba ai-han sira, tanba ita nia ai-han lokal nee la sufisiente atu hatan nesesidade familia uma kain lorloron nian, tanba nee ita tenki depende mos ba produtu importasaun,” tenik nia.

Nia afirma, hanoin governu nafatin lockdown iha lina entreda sira, maibe tenki define ba ema deit sasan sira tenki kontinua tama sai, importante maka sasan sira neebe importa mai nee tenki dezinfekta molok halo distribuisaun.*

Reportajen: Santina Castro
Editor: Domingas Gomes

LEAVE A REPLY

Please enter your comment!
Please enter your name here