DILI, STLNEWS.co – Permaculture Of Timor Lorosae (PERMATIL) liu husi atividade halo konservasaun bee iha foho leten, konsege hamoris bee matan 300 resin iha Timor Leste laran tomak.
Kestaun nee hatoo husi Diretor Ezekutivu Permaculture Of Timor Lorosae (PERMATIL), Ego Lemos ba jornalista sira, bainhira halo enkontru ho Prezidente Republika Jose Ramos Horta iha Palasiu Prezidente Bairru Pite, Tesa nee (28/03/2023).
Diretor PERMATIL dehan, atividade konserva bee iha foho leten dezde kedas 2004, moviliza juventude, autoridade lokal ho komunidade tomak, koko reablita fila fali ho natural sira neebe iha Timor laran tomak, tanba debu natural mak hanesan basia boot ida hodi akapta udan been ba rai laran, hodi hamoris fali bee matan sira kadalak hodi sai ba mota.
PERMATIL nia programa oinsa rezolve bee, tanba durante nee inan feton sira lao dook mak kuru bee, tanba nee ho programa nee oinsa halo inan feton no oan sira mos bele deskansa netik.
“Buka tuir bee matan sira neebe mak maran, ita koko reablita atu hamoris fila fali, nunee komunidade sira bele asesu fali bee, sira bele lao maibe la bele lao distansia neebe mak dook liu, maibe lao ho distansia besik atu nunee ema hotu bele iha tempu hodi halimar, nunee mos bainhira reablita bee matan sira mak komunidade bele konsumu iha uma laran, fo hemu animal no kuda modo no bele hakiak ikan no bele hadia fali problema mal nutrisaun neebe durante nee ita hasoru,” katak nia,
Nia hatutan, problema mal nutrisaun neebe mak povu hasoru iha Timor Leste kauza ida mak bee tanba nee se rejolve problema bee bele mos rejolve problema mal nutrisaun iha Timor.
Nia mos senti kontenti ho prezidente nia deklarasaun konaba husu PERMATIL atu halo konservasaun ba bee, nia mos hatete katak, agora laos tempu atu halo enkontru ka konferensia no workshop, maibe tempu atu halo asaun no hamoris lalais bee matan presiza jestaun.
Prezidente Republika Jose Ramos Horta hatete, bee importante ba ema nia moris, tanba nee presiza tau atensaun hodi konserva bee ba komunidade sira hodi uza ba nesesidade loron-loron nia.
(eme)
